Dis-sena se tibqa’ mfakkra għall-irkupru b’saħħtu li għamel is-settur turistiku f’pajjiżna wara t-turbulenza globali li ġabet magħha l-pandemija.
L-irkupru mhux biss qed jiġi rrapportat f’numri ta’ statistiċi, imma qed jinnotawh ukoll is-sidien tal-lukandi u r-ristoranti.
ONE News tkellem mal-General Manager tal-lukanda Hyatt Regency, Mark Vella, li lejliet il-Milied, wera s-sodisfazzjon tiegħu jara l-lukanda li jmexxi mimlija attività.
Vella spjega, “Se magħlqu s-sena tajba ħafna, avolja bdejna fl-ewwel tliet xhur, bħal kulħadd, imma mbgħad għalaqna vera tajjeb. Is-sena d-dieħla għalina qed tidher inkoraġġanti bħala numri, aħna ovvjament fis-sajf nafu li Malta timxi ħafna. Għall-ewwel tliet xhur grazzi għall-events u gruppi li huma diġà on the books, jiġifieri kkonfermati, jidher li se jkollna l-ewwel tliet xhur tajbin u nkoraġġanti, li nafu li huwa żmien li forsi huwa diffiċli għal Malta bħala turiżmu, imma għalina sejjer prattikament tajjeb.”
Żied jgħid li waqt l-agħar mumenti għat-turiżmu, fi żmien li matulu l-Gvern kien ta’ sostenn fost oħrajn għal dan is-settur tant importanti, il-lukanda ħasbet għaż-żmien ta’ wara l-maltemp.
Hu sostna, “Aħna ftaħna fil-pandemija, jiġifieri dak iż-żmien, bnejna reputazzjoni tajba għax ma stajniex nieħdu turisti, tajjeb fuq l-ikel ukoll. Għadna tim tajjeb ħafna, tim żgħir, tim żagħżugħ, kulħadd hija l-ewwel darba forsi f’dawn iċ-ċertu pożizzjonijiet u naħseb li l-lukanda bniet reputazzjoni tajba anke fuq is-suq Malti wkoll.”
Il-President tal-Assoċjazzjoni Maltija għal-Lukandi u r-Ristoranti, l-MHRA, Tony Zarha, tenna li dan l-andament qed jinħass fost l-operaturi kollha tal-akkomodazzjoni.
Zahra qal, “Il-lukandi għandhom sitwazzjoni tajba, infatti qed nistennew li sal-aħħar tas-sena jkollna sitwazzjoni kważi tajba daqskemm kienet l-aħjar sena. L-aħjar sena f’dan il-perjodu kien iż-żmien 18-19.”
Qal ukoll li l-Assoċjazzjoni qed tħares lejn l-2023 minn lenti pożittiva, biex dan ir-ritmu li qabad fil-mument li pajjiżna reġa’ beda jilqa’ fih it-turisti, jibqa’ għaddej.
Zahra temm jgħid, “Ir-ristoranti qed jirraportaw sitwazzjoni tajba ħafna għax il-Maltin jidhru li wara sentejn magħluqin, issa lesti biex joħorġu u jgawdu. Nisperaw li nibqgħu sejrin hekk, għandna l-istakeholders kollha magħqudin flimkien u allura nistennew li dix-xitwa tkun tajba u sintendi, is-sena d-dieħla nħarsu lejha b’ottimiżmu.”
