Il-Festival Gaulitana jirritorna bejn it-8 ta’ Marzu u s-7 t’April 2019, b’edizzjoni li ser tkun programm eċitanti ta’ attivitajiet, marbutin mat-tema “Il-Mara fis-Soċjeta`”.
Il-festival ħa spunt mill-Manon Lescaut (l-opra magħżula għal din is-sena) u ser jenfasizza l-irwol tal-mara fl-arti u anka f’kuntest soċjo-politiku billi jippreżenta xogħolijiet u stejjer ta’ kompożituri u artisti nisa.
Bħas-soltu, Gaulitana ser jikkonsisti f’attivitajiet varji ta’ stili differenti – orkestrali, chamber, kuncerti strumentali u vokali, minn artisti u gruppi lokali u internazzjonali. Mtella’ f’siti varji f’Għawdex u anke f’Malta, il-festival jinkorpora diversi forom ta’ arti, minn letteratura, sa ċinema u live-painting filwaqt li l-istili mużikali jinkludu jazz, pop, musical theatre u mużika folkloristika. Ser tinżamm ukoll esibizzjoni minn 30 artista femminili miċ-Ċina waqt li ser jiġi kkommemorat il-biċentinarju mit-twelid ta’ Clara Schumann.
Il-festival jagħlaq bl-OPERA+ Weekend (5-7 t’April), tlett ijiem ta’ bonanza kulturali, bl-avveniment prinċipali jkun l-produzzjoni tal-Manon Lescat ta’ Puccini. L-opra ser tittella’ wara 20 sena mill-aħħar rappreżentazzjoni hawn Malta, b’Miriam Gauci fl-irwol prinċipali.
Entitajiet li ser jikkolaboraw mal-festival jinkludu il-Malta Philharmonic Orchestra, Heritage Malta, l-Universita` ta’ Malta u l-Akkademja ta’ l-Ilsien Malta. Fost l-istituzzjonijiet internazzjonali li qed jahdmu ma’ Gaulitana nsibu: Fondazione Giacomo Puccini Lucca, Concorso Jan Langosz, Festival Belliniano u Associazione FEM.
Alexander Frey ser jerga’ jkun l-Artist-in-Residence f’din il-festa t’arti li tinkludi l-Espresso Series ġewwa ċ-Ċittadella, is-serje TALK re u – li tintroduċi kunċerti li ikunu ser jsiru fil-ġranet sussegwenti – u Music Alive, avvenimenti li jippreżentaw mużika ‘live’ lil udjenza aktar estiża.
Gaulitana huwa magħruf għall-programm tal-GAU Learn li jressaq l-ġenerazzjoniet żgħar lejn l-arti, speċjalment permezz ta’ opera 4 me – adattament tal-opra intiż għall-iskejjel.
Gaulitana huwa parti mill-Gozo Cultural Support Programme ta’ l-Arts Council Malta f’kollaborazzjoni mal-Ministeru ghal Ghawdex. Booking għall-Manon: www.teatruaurora.com jew fuq 79045779
