Il-Ġimgħa filgħaxija kellna żewġ konfronti interessanti li fihom kienu involuti t-tliet timijiet fil-quċċata li huma Luxol, Valletta u Swieqi United.
Fil-konfront dirett bejn il-ġirien Luxol St. Andrews u Swieqi United, Luxol ħarġu rebbieħa bl-iskor ta’ 3-1. Il-logħba intlagħbet fil-Padiljun tal-Iskola Nazzjonali tal-Isport u wriet ċar il-bilanċ li jeżisti bejn dawn iż-żewġ timijiet. Għat-tim minn St. Andrews skurjaw Mark Zammit, Celino Alves u George Frendo, filwaqt li l-uniku gowl ta’ Swieqi United ġie skurjat minn Stefan Camilleri.
Fil-logħba l-oħra li ntlagħbet fil-Padiljun Sportiv ta’ Kordin, it-tim tal-Istudenti tal-Università ta’ Malta kellu jbaxxi rasu għaċ-ċampjins Valletta li ħarġu rebbieħa bl-iskor ta’ 8-3. Il-gowls Beltin waslu minn tripletta ta’ Jovica Milijic u gowl kull wieħed għal Daniel Saliba, Dylan Musu, Camilo Andres Vangeas Gomes, Denis Di Maio u Mohamed Lamari. Għall-Universitarji kellna doppjetta ta’ Lee Grech u gowl ta’ Daniele De Gennaro.F’aktar logħbiet li kellna matul din il-ġimgħa, Pietà Hotspurs jieħdu rebħa oħra din id-darba kontra t-tim ta’ taħt id-dsatax-il sena ta’ Luxol bl-iskor ta’ 3-2.
Birkirkirkara ħadu rebħa komda meta għelbu lil UM Futsal Academy bl-iskor ta’ 17-1.
Tarxien Rainbows irritornaw għar-rebħ, meta għelbu lit-tim ta’ taħt il-21 sena ta’ Swieqi United bl-iskor ta’ 10-1.
B’hekk fil-klassifika Luxol u Valletta għandhom 24 punt segwit minn Swieqi United li issa għandhom 21 punt. Birkirkara għandhom 18-il punt, segwiti mit-tim tal-Università ta’ Malta li għandhom 15-il punt u Tarxien Rainbows li għandhom tnax-il punt. Fin-naħa t’isfel insibu lil Pieta Hotspurs b’disa’ punti segwiti mit-tim ta’ taħt il-21 sena ta’ Swieqi United, il-UM Futsal Academy u t-tim ta’ taħt id-dsatax-il sena ta’ Luxol li għandhom tliet punti.
Nhar it-Tnejn 10 ta’ Diċembru Valletta jilagħbu kontra t-tim ta’ taħt il-21 sena ta’ Swieqi United biex b’hekk kulħadd ikun lagħab disa’ logħbiet. Din il-logħba se tintlagħab fil-Padiljun Sportiv ta’ Kordin u tibda fit-20:15.
Intant ilbierah wara nofsinhar ittellgħu l-poloz tal-kompetizzjoni Knock Out kif ġej:
Rawnd Preliminari
Luxol U19 vs Swieqi United U21
Pietà Hotspurs vs UM Futsal Academy
Rawnd Prinċipali
Ir-rebbieħ bejn Pietà Hotspurs u Um Futsal Academy vs L-Università ta’ Malta
Swieqi United vs Luxol
Ir-rebbieħ bejn Luxol U19 u Swieqi U21 vs Valletta
Birkirkara vs Tarxien Rainbows
Semi Finali
Ir-rebbieħ tal-ewwel logħba tar-rawnd prinċipali kontra r-rebbieħ tat-tieni logħba tar-rawnd prinċipali.
Ir-rebbieħ tat-tielet logħba tar-rawnd prinċipali kontra r-rebbieħ tar-raba’ logħba tar-rawnd prinċipali.
