Luxol u Swieqi United jibqgħu b’punti massimi wara erba’ logħbiet, b’tal-aħħar jegħlbu lit-tim tal-Istudenti tal-Università ta’ Malta bl-iskor ta’ 4-2.
It-tim tal-Universitarji mmexxi mill-kowċ Clayton Felice, qed jorganizza ruħu wara diversi tibdiliet li kellu mill-istaġun li għadda. Għaldaqstant Swieqi United immexxija mill-plejer kowc Boycho Marev qed jikkonfermaw posthom mal-aqwa tlieta.
Kienu l-Universitarji li fetħu l-iskor wara seba’ minuti logħob, permezz tal-captain Neil Cauchi. Iżda fl-aħħar żewġ minuti tal-ewwel taqsima Swieqi United dawru r-riżultat u sabu x-xibka permezz ta’ Boycho Marev u Andre Ciancio.It-tieni taqsima kienet waħda divertenti u eċċitanti miż-żewġ naħat u wara sitt minuti Stefan Camilleri żied gowl ieħor għal Swieqi United. Tliet minuti wara l-Universitarji qawwew it-tamiet tagħhom u naqsu l-iskor permezz ta’ Daniele Degennaro. Fl-aħħar minuta Leonardo De Souza skurja r-raba’ gowl u ssiġġilla r-rebħa għal Swieqi United bl-iskor finali ta’ 4-2.
F’aktar logħbiet li kellna matul din il-ġimgħa, Luxol għelbu lit-tim tagħhom ta’ taħt id-dsatax-il sena bl-iskor ta’ 14-2.
Birkirkara kisbu t-tieni rebħa konsekuttiva meta għelbu lit-tim ta’ taħt il-21 sena ta’ Swieqi United bl-iskor ta’ 10-1.
Valletta għelbu lil Tarxien Rainbows bl-iskor ta’ 8-1 u Pietà Hotspurs għelbu lil UM Futsal Academy bl-iskor ta’ 11-5.
B’hekk fil-klassifika naraw lil Swieqi United u Luxol fil-quċċata bi 12-il punt, segwiti minn Valletta li b’logħba inqas għandhom disa’ punti. Birkirkara u Tarxien Rainbows għandhom sitt punti. Pieta Hotspurs, it-tim ta’ taħt il-21 sena ta’ Swieqi United, l-Università ta Malta u l-UM Futsal Academy għandhom tliet punti, filwaqt li t-tim ta’ taħt id-dsatax-il sena ta’ Luxol għadhom mingħajr punti.
Din il-gimgha jkollna dawn il-logħbiet:
- It-Tnejn 5 ta’ Novembru – Birkirkara vs Luxol St. Andrews U19 (Fil-Padiljun Sportiv ta’ Kordin fit-20:15)
- It-Tlieta 6 ta’ Novembru – Swieqi United vs Valletta (Fil-Padiljun Sportiv ta’ Kordin fit-20:15)
- Il-Ħamis 8 ta’ Novembru – Università ta’ Malta vs Swieqi United U21 (Fil-Padiljun Sportiv ta’ Kordin fit-20:15)
- Il-Ġimgħa 9 ta’ Novembru – UM Futsal Academy vs Tarxien Rainbows (Fil-Padiljun Sportiv ta’ Kordin fit-20:15)
- Luxol St. Andrews vs Pieta Hotspurs (Fil-Padiljun tal-Iskola Nazzjonali tal-Isport f’Pembroke fid-20:45)
Ritratt: Joe Borg
