Il-klabb Portugiż ta’ SL Benifca ħabbru sħubija mal-Mediterranean College of Sport in Malta, bl-impenn prinċipali jkun l-iżvilupp globali taż-żgħażagħ fil-futbol. Il-kollaborazzjoni tinvolvi t-twaqqif ta’ skola internazzjonali f’Malta, fejn koordinatur rinomat ta’ SL Benfica se jmexxi l-programm tal-futbol.
L-għan prinċipali ta’ dan il-ftehim li ġie ffirmat din il-ġimgħa huwa li Benfica jkompli jespandu internazzjonalment. Il-ftehim komprensiv ikopri ħames snin, li jirrifletti d-dedikazzjoni ta’ SL Benfica biex irawwem it-tkabbir atletiku u akkademiku.
Dan il-ftehim ġie ffirmat fil-kwartieri ġenerali ta’ Benfica f’Lisbona. Pio Vassallo, Chairperson ta’ Mediterranean College of Sport u Charlo Bonnici, Kap Eżekuttiv iffirmaw f’isem il-Mediterranean College of Sport filwaqt li Rui Manuel César Costa, President tal-bord tad-diretturi ta’ SL Benfica u Luís Paulo da Silva Mendes, Viċi President ta’ SL Benfica iffirmat f’isem il-klabb Portugiż. Preżenti għall-iffirmar kien hemm ukoll Natalie Briffa Farrugia, Chairperson ta’ Vassallo Group u direttur tal-MCS u d-Direttur tal-Iżvilupp Sportiv ta’ George Micallef MCS.
Bħala parti minn dan il-ftehim l-atleti li jattendu l-Malta College of Sport in Malta se jkunu evalwati fil-Portugall minn Benfica filwaqt li se jingħataw l-opportunita li jipparteċipaw f’tournaments organizzati mill-stess klabb u anke ikunu jistgħu jirreġistraw fil-Programm Elite Internazzjonali ta’ Benfica.
Benfica għandhom sħubijiet simili fil-Lussemburgu u l-Litwanja fejn twaqfu skejjel tal-futbol biex irawmu t-talent u jippromwovu l-isport. F’termini ta’ sħubijiet tekniċi, Benfica ingħaqdet ma’ FC Pyramids fl-Eġittu, Al Nasr SC fl-Emirati Għarab Magħquda, Eastwood Community FC fir-Renju Unit, Coimbra Sports fil-Brażil, FC Sudamerica fl-Istati Uniti, u Sreenidi Deccan FC fl-Indja. Barra minn hekk, Benfica għamel ftehimiet kollaborattivi ma’ FC Dallas u Gotham FC fl-Istati Uniti.
Benfica rebħu l-premju għall-aqwa akkademja fid-dinja fil-Global Soccer Awards għal tliet darbiet.
