Il-ġurnal awtorevoli POLITICO żvela ftehim li qed isir minn wara l-kwinti fil-Parlament Ewropew bejn il-Partit Popolari Ewropew, il-grupp liberali Renew Europe, u l-grupp tax-Xellug, sabiex minkejja l-oġġezzjonijiet kbar tal-gruppi politiċi l-oħrajn u ta’ bosta uffiċjali tal-Parlament, il-Kap tal-uffiċċju tal-President tal-Parlament, Roberta Metsola, jitlaħħaq is-Segretarju Ġenerali l-ġdid ta’ din l-istituzzjoni Ewropea.
Is-Segretarju Ġenerali huwa l-ogħla uffiċjal tal-Parlament Ewropew u jmexxi l-amministrazzjoni kollha ta’ din l-istituzzjoni ewlenija tal-Unjoni Ewropea.
Aktar kmieni din il-ġimgħa, il-ġurnal kien irrapporta dwar il-kontroversja kbira li qed iqajjem fl-Unjoni Ewropea l-fatt li l-President tal-Partit Popolari Ewropew, Manfred Weber, u l-President tal-Parlament Ewropew, Roberta Metsola, qed jimbuttaw lill-Kap tal-uffiċċju ta’ Metsola – it-Taljan Alessandro Chioccetti – biex isir is-Segretarju Ġenerali l-ġdid tal-Parlament Ewropew wara li jtemm il-kariga tiegħu is-Segretarju Ġenerali attwali, il-Ġermaniż Klaus Welle.
Il-kontroversja dwar Chioccetti splodiet minħabba dak li qed jitqies bħala nepotiżmu sfaċċat minkejja n-nuqqas ta’ esperjenza tiegħu għal dan l-irwol importanti ħafna. Alessandro Chiocchetti, kien l-assistent ta’ Marcello Dell’Utri, li kien politiku Taljan u l-id il-leminija ta’ Silvio Berlusconi u li nstab ħati u ntbagħat seba’ snin ħabs minħabba rabtiet mal-mafja ta’ Sqallija. Il-Kap tal-Uffiċċju ta’ Metsola huwa wkoll alleat tas-Segretarju Ġenerali attwali tal-Parlament Ewropew, Klaus Welle, u tal-eks President tal-Parlament, it-Taljan Antonio Tajani. Chioccetti nnifsu ma ġiex akkużat b’korruzzjoni jew rabtiet mal-mafja, iżda l-qrubija tiegħu mal-alleati ta’ Berlusconi kienu sors ta’ kontroversja fil-Parlament Ewropew.
POLITICO żvela li, sabiex il-Partit Popolari Ewropew jinstalla lill-Kap tal-Uffiċċju ta’ Roberta Metsola fit-tmun tal-magna amministrattiva tal-Parlament Ewropew, sar qbil biex jinħoloq dipartiment tal-politika ġdid fil-Parlament li jmexxih il-grupp tax-Xellug. Fil-frattemp, ġew illaxkati l-kriterji biex wieħed isir Segretarju Ġenerali, sabiex jiġi żgurat li Chioccetti jikkwalifika.
Il-ġurnal irrapporta li l-ftehim sar nhar it-Tnejn waqt laqgħa tal-Bureau tal-Parlament Ewropew, l-organu setgħani li jieħu d-deċiżjonijiet fuq il-materji amministrattivi, tal-istaff, u organizzattivi kollha. Kien waqt din il-laqgħa, li dawk li attendew – inkluża l-President tal-Parlament, Roberta Metsola – approvaw li jinħoloq “direttorat ġenerali” ġdid fil-Parlament. Dan l-Uffiċċju l-ġdid se jingħata t-titlu formali ta’ Direttorat Ġenerali għas-Sħubiji tad-Demokrazija Parlamentari, iżda ftit li xejn hu magħruf x’se tkun il-funzjoni tiegħu jew kemm se jiswa flus lill-Parlament.
Waqt il-laqgħa tat-Tnejn, ġie deċiż ukoll li tinfetaħ uffiċjalment it-tiġrija għall-pożizzjoni ta’ Segretarju Ġenerali. Fost l-oħrajn, ivvutaw biex titbaxxa l-iskala li uffiċjal irid ikollu biex ikun eliġibbli.
Il-ġurnal POLITICO rrapporta li diversi minn dawk preżenti għal-laqgħa tal-Bureau tal-Parlament Ewropew nhar it-Tnejn opponew dan il-manuvri għax jidhru mfasslin apposta biex il-Kap tal-Uffiċċju ta’ Metsola jkun jista’ japplika għal din il-kariga għolja u fihom xamma ta’ tagħwiġ tar-regoli biex jiġi akkomodat xi ħadd. Mexxejja mill-grupp tas-Soċjalisti u d-Demolratiċi u mill-Grupp tal-Ħodor ivvutaw kontra t-tibdil tal-kriterji biex wieħed ikun jista’ japplika. Madankollu, koalizzjoni bejn il-Partit Popolari Ewropew, il-grupp tar-Renew, u l-grupp tax-Xellug, xejnet din l-oppożizzjoni.
Il-President tal-grupp tas-Soċjalisti u d-Demokratiċi fil-Parlament Ewropew, Iratxe García Pérez, insistiet li l-ismijiet li jitressqu għall-pożizzjoni importanti ta’ Segretarju Ġenerali tal-Parlament Ewropew għandu jkollhom il-kwalifiki u l-esperjenza kif ukoll il-karatteristiċi tal-personalità meħtieġa. Hija saħqet ukoll fuq l-importanza tal-bilanċ tal-ġeneri, kif ukoll ta’ dak ġeografiku u politiku.
Min-naħa tiegħu, id-deputat Ewropew tal-Ħodor, Daniel Freund, qal li l-Grupp tiegħu fil-Parlament Ewropew jinsisti li jiġu rrispettati r-regoli kollha fil-ħatra ta’ Segretarju Ġenerali ġdid. Huwa saħaq li l-Grupp se jisħaq li jinħatar xi ħadd li jkun verament ikkwalifikat.
Minbarra l-POLITICO, ġurnali oħra Ewropej irreferew għal dawn il-manuvri biex allegatament jiġi aġevolat il-Kap tal-Uffiċċju ta’ Roberta Metsola.
