Il-Gvern se jagħti żewġ miljun u tnax-il elf ewro lill-Fondazzjoni Arka t’Għawdex sabiex ikunu provduti servizzi residenzjali lill-persuni b’diżabilità.
Dan tħabbar f’konferenza tal-aħbarijiet bit-tema Gvern għan-Nies, fejn fiha ġie ffirmat ftehim bejn il-Ministeru għall-Inklużjoni u l-Kwalità tal-Ħajja, l-Aġenzija Sapport u l-Fondazzjoni Arka għat-tliet snin li ġejjin.
Is-servizzi se jkunu provduti minn tliet residenzi li għandha l-Fondazzjoni. Dawn huma Dar Arka, Dar il-Ġublew tal-Ħniena u Dar il-Madonna ta’ Pinu.
Minn dan se jibbenefikaw 22 persuna b’diżabilità fuq livell ta’ servizz residenzjali, kif ukoll servizz ta’ respite f’Dar Arka.
Id-Direttur ta’ Dar Arka, il-Kanoniku Dun Michael Galea, qal kif dan il-Gvern kien ta’ spalla għall-fondazzjoni.
Huwa spjega: “Dak li assistejna għalih illum huwa kollaborazzjoni bejn il-Knsija u l-Istat sabiex il-fondazzjoni Arka tkun tista’ tibqa’ twettaq il-ħidma tagħha u tmexxi dawn id-djar, l-Arka u tnejn oħra, biex nagħtu l-aqwa u l-aħjar servizz lill-persuni b’diżabilità u familjari tagħhom.”
Il-Fondazzjoni Arka se tipprovdi 23 sodda, 13 minnhom minn Dar Arka u ħames sodod kull wieħed minn Dar il-Ġublew tal-Ħniena u Dar il-Madonna ta’ Pinu.
Il-Kap Eżekuttiv ta’ Aġenzija Sapport Ruth Sciberras tenniet l-importanza ta’ servizzi fil-komunità għall-persuni b’diżabilità.
Hija qalet: “Din il-kollaborazzjoni bejn Aġenzija sapport u fondazzjoni arka se tassigura li wieħed u għoxrin persuna b’diżabilità f’Għawdex se jkollhom dar residenzjali meta jkollhom bżonn. Arka toffri wkoll respite fil-gżira Għawdxija.”
Il-Ministru Julia Farrugia Portelli saħqet li dan se jkompli jtejjeb il-kwalità tal-ħajja ta’ dawn il-persuni.
Hija stqarret: “Kwalità ta’ tajba tirrifletti wkoll is-servizzi li wieħed joffri fil-komunità. Dan is-servizz bejn il-Gvern u l-Fondazzjoni arka jara li numru ta’ persuni b’diżabilità jingħataw l-aqwa kura possibbli.”
Il-Ministru Clint Camilleri spjega kif il-Gvern qed juri b’eżempji konkreti li Għawdex qed jingħata prijorità f’kull qasam, fosthom fil-kwalità tal-ħajja tan-nies.
Huwa sostna: “Permezz ta’ dan il-ftehim l-istess fondazzjoni ser tkun tibqa’ tagħmel il-ġid għal dawn il-persuni u fl-aħħar mill-aħħar għal persuni f’Għawdex.”
Preżenti għall-iffirmar kien hemm ukoll Is-Segretarju Permanenti Matthew Vella.
