Ġie ffirmat ftehim biex art, li tinsab taħt is-Sur ta’ San Ġakbu f’Ħaż-Żabbar, għaddiet għand l-għaqda sportiva Żabbar St Patrick FC b’ċens għal 45 sena. Dan il-ftehim ġie ffirmat fil-preżenza tal-Ministru għall-Edukazzjoni, l-Isport, iż-Żgħażagħ, ir-Riċerka u l-Innovazzjoni, Clifton Grima.
Permezz tas-sussidju ta’ ħamsa u disgħin fil-mija offrut mill-Gvern fuq l-akkwist ta’ artijiet biex jiġu kkonvertiti f’faċilitajiet sportivi, l-ammont totali ta’ kera li l-klabb se jħallas fis-sena hu ta’ tliet mija u tmien ewro u ħamsin ċenteżmu (€308.50), minflok il-valur attwali ta’ sitt elef, mija u sebgħin ewro (€6,170).
B’hekk issa l-klabb qiegħed f’pożizzjoni biex jamministra din l-art u għandu inċentiv ewlieni biex jinvesti f’faċilitajiet sportivi fis-sit u servizzi anċillari.
Dawn se jibbenefikaw minnhom ukoll it-tfal u ż-żgħażagħ, għax il-faċilitajiet se jkunu jistgħu jagħmlu użu minnhom ukoll kemm il-Youth Nursery tal-klabb u fil-ħinijiet tal-iskola, bi ftehim, il-proprjetà tinfetaħ għall-użu tat-tfal tal-iskola.
Il-President taż-Żabbar St Patrick FC, Dr Kevin Deguara, qal li, b’dan il-ftehim, il-klabb issa jista’ jagħmel qabża ta’ kwalità b’faċilitajiet moderni li se jkunu wkoll ta’ benefiċċju tal-komunità kollha kemm hi.
“Wara żmien ta’ negozjati ħa jkollna biċċa art fejn nistgħu niżviluppaw iktar dak li huwa training complex biex iż-żgħażagħ Żabbarin ikollhom fejn iqattgħu l-ħin tagħhom u jiżviluppaw it-talenti tagħhom.”
Kevin Deguara – President St Patrick FC
Min-naħa tiegħu, il-Ministru Grima qal li dan hu ftehim ieħor li juri l-impenn tal-Gvern biex jgħin lill-assoċjazzjonijiet u għaqdiet sportivi f’kull livell.
“Permezz ta’ SportMalta rridu dejjem nassiguraw li nagħtu aktar għodda lill-klabbs tagħna biex huma jkunu jistgħu jinvestu f’faċilitajiet sportivi li minnhom igawdu t-tfal u ż-żgħażagħ tal-lokalità.”
Clifton Grima – Ministru
