Ġie ffirmat Memorandum of Understanding bejn is-Segretarjat Parlamentari għar-Riformi, Ċittadinanza u Simplifikazzjoni tal-Proċessi Amministrattivi fi ħdan l-Uffiċċju tal-Prim Ministru u l-Fondazzjoni għal Servizzi ta’ Ħarsien Soċjali, l-FSWS, b’rabta mar-riforma tal-kannabis.
Il-ftehim mifrux fuq sentejn ikopri għajnuna finanzjarja ta’ aktar minn €400,000 lill-FSWS biex permezz tal-Aġenzija Sedqa tkun tista’ tkompli l-ħidma tagħha fl-iskejjel kontra l-abbuż mid-droga u mis-sustanzi. Dan se jkun qed isir permezz tal-programm TFAL 5 (tfal favur ambjent liberu) li s’issa diġà tmexxa bħala proġett pilota fejn laħaq ħames mitt tifel u tifla fi skejjel tal-Knisja u indipendenti. Sal-aħħar tal-2020, b’dan il-programm, se jkunu ntlaħqu mal-5,000 student u studenta.
Bil-ftehim li ġie ffirmat, l-FSWS se tkun tista’ tixtri vettura mobbli biex tintuża f’attivitajiet differenti fost il-pubbliku bil-għan li twassal messaġġi pożittivi. Apparti dan, se jkunu qed isiru diversi pubblikazzjonijiet biex jitqassmu fl-iskejjel flimkien ma’ logħob edukattiv kif ukoll sessjonijiet fi skejjel sekondarji u attivitajiet fil-komunità li jagħtu aktar viżibilità.
Signing of a Memorandum of Understanding between the Parliamentary Secretariat for Reforms, Citizenship and Simplification of Administrative Processes and the Foundation for Social Welfare Services on initiatives related to the campaign on the Cannabis Reform – Auberge de Castille Valletta – 6-8-19
Is-Segretarju Parlamentari Julia Farrugia Portelli qalet li dan il-ftehim hu frott xhur ta’ diskussjonijiet u ta’ ħidma li ilhom għaddejjin bejn iż-żewġ naħat. Irringrazzjat lill-FSWS għall-impenn li dejjem uriet f’din l-ewwel parti tar-riforma tal-kannabis li għandha l-għan li ssaħħaħ il-ġlieda kontra l-abbuż mid-droga.
Min-naħa tiegħu, il-Ministru Michael Falzon qal li permezz ta’ dan il-ftehim il-gvern flimkien mal-FSWS qed juri l-impenn tiegħu li r-riforma tal-kannabis issir b’mod fejn kulħadd, speċjalment it-tfal u l-adoloxxenti, ikun infurmat bl-aħjar mod possibbli. Żied li din il-ħidma se ssib l-appoġġ kollu meħtieġ sabiex tkompli tissaħħaħ il-ġlieda kontra l-abbuż mid-droga u minn sustanzi oħra.
Il-ftehim kien iffirmat mis-Segretarju Permanenti Vincent Muscat kif ukoll mill-Kap Eżekuttiv tal-FSWS Alfred Grixti fil-preżenza tal-Ministru Michael Falzon u tas-Segretarju Parlamentari Julia Farrugia Portelli.
