Bejn din is-sena u s-sena d-dieħla, il-Gvern se jkun investa biljun ewro f’għajnuna għall-familji u n-negozji, sabiex il-kontijiet tal-enerġija u l-prezzijiet tal-fjuwils ma jogħlewx.
Tkellmet dwar dan il-Ministru responsabbli mill-Enerġija, Miriam Dalli, waqt konferenza tal-aħbarijiet bit-tema ‘Malta – Ċertezza u Stabbiltà’, li fiha ffukat fuq kif il-Gvern se jalloka 10 fil-mija mill-Budget għas-sena d-dieħla sabiex jassigura stabbiltà fil-prezzijiet tal-enerġija u tal-fjuwil għall-Maltin u l-Għawdxin.
Hija tat spjegazzjoni ta’ x’kien jiġri kieku l-Gvern ma intervjeniex u investa dawn il-miljuni ta’ ewro.
Qalet, “Li kieku ħallejna d-dawl, l-ilma, il-fjuwils, u l-gass jogħlew skont is-suq internazzjonali, kieku l-inflazzjoni f’pajjiżna kienet tkun aktar mid-doppju ta’ dak li hi llum. Kieku familja ta’ erbgħa kienet se tispiċċa b’elfejn ewro anqas fil-but kull sena, jiġifieri aktar minn paga medja ta’ xahar sħiħ. Ma għażilniex din it-triq ta’ tariffi li jogħlew skont il-suq.”
Il-Ministru Dalli fakkret li, quddiem sfida internazzjonali fil-prezzijiet taż-żejt qabel l-2012, il-gvern Nazzjonalista kien għolla t-tariffi tad-dawl u l-ilma b’mod qawwi. Dik id-deċiżjoni kienet swiet aktar minn mitt miljun ewro minn bwiet in-nies. Sitwazzjoni bħal dik qed narawha sseħħ illum ukoll f’pajjiżi oħra li għażlu t-triq li jħallu l-prezzijiet tal-enerġija jogħlew minflok żammew mat-triq tal-istabbilità, bħalma għamel il-Gvern Malti.
Ma naqasx li l-Ministru għall-Enerġija tagħmel referenza wkoll għall-fatt li pajjiżna kiseb bosta derogi fil-livell Ewropew għas-settur tal-enerġija.
L-enerġija rinnovabbli wkoll ingħatat importanza fil-Budget għas-sena d-dieħla, u l-Gvern se jniedi bosta skemi ta’ għajnuna sabiex ikompli jżid aktar sistemi ta’ enerġija rinnovabbli.
Qalet, “Is-sena d-dieħla, permezz tal-iskemi ta’ għajnuna, se nkomplu nżidu l-ħidma tagħna u l-investiment biex ikompli jkollna aktar sistemi ta’ rinnovabbli. B’mod globali, għas-sena d-dieħla, se nkunu qegħdin ninvestu aktar minn €28 miljun f’sistemi differenti ta’ rinnovabbli.”
Il-Ministru Dalli kompliet tgħid li llum Malta għandha aktar minn 10.7 fil-mija tal-enerġija li ġejja minn sorsi rinnovabbli meta kkumparat mas-3.7 fil-mija li kellna fl-2013.
Sabiex tibqa’ tiġi żgurata s-sigurtà fil-provvista, Malta qed tinvesti fit-tieni interconnector b’investiment ta’ mija u sittin miljun ewro – dan se jkun jagħti aktar flessibilità u serħan il-moħħ.
Il-Ministru elenkat numru ta’ investimenti kruċjali li mistennija jsiru fix-xhur u s-snin li ġejjin minn entitajiet u aġenziji li jaqgħu taħt ir-responsabbilità tagħha.
Fis-sena 2023, il-Korporazzjoni għas-Servizzi tal-Ilma se taħdem biex tlesti diversi proġetti, li flimkien jiswew 37 miljun ewro, sabiex tkompli ttejjeb l-infrastruttura tal-ilma u tad-drenaġġ.
L-Enemalta wkoll se tidħol fit-tieni sena tal-programm ta’ 90 miljun ewro biex isiru proġetti ta’ tisħiħ tan-netwerk tad-distribuzzjoni tal-elettriku, biex dan is-servizz isir aktar sigur. B’riżultat tax-xogħlijiet li saru din is-sena, b’investiment ta’ 15-il miljun, is-sajf li għadda kellna tnaqqis ta’ 33 fil-mija fil-qtugħ tal-provvista.
Il-Ministru Dalli qalet li s-sena d-dieħla se tkun kruċjali għall-investiment tal-Gvern fl-enerġija rinnovabbli offshore, għax se jistieden lis-settur privat jinvesti f’dan il-qasam ta’ enerġija nadifa fl-ibħra Maltin.
Ma naqasx li ssemmi miżuri oħra bħall-elettrifikazzjoni tal-karozzi u l-ħidma sabiex jiżdiedu elf u mitejn charging station ġdid fis-sentejn li ġejjin.
Qalet, “Il-ħidma tagħna biex niżguraw servizzi tal-enerġija ambjentalment sostenibbli, affidabbli, u bi prezz stabbli hija mifruxa fuq ħafna binarji, li qed ngħaqqduhom flimkien biex nilħqu l-għan aħħari tagħna – serħan il-moħħ lill-familji u n-negozji tagħna. Bil-Budget għas-sena d-dieħla – l-ewwel minn ħamsa ta’ din il-leġislatura – qed inkomplu nuru kif se nkomplu din il-ħidma. Fejn pajjiżi oħra qed jaraw sfida, aħna qed naraw opportunità li nkomplu naħdmu għal futur sostenibbli.”
Il-Ministru Miriam Dalli nnutat ukoll li s-sħab soċjali kollha ta’ pajjiżna laqgħu l-investiment massiċċ li qed jagħmel il-Gvern fis-settur tal-enerġija, biex b’hekk ma jitfax il-piżijiet fuq il-ħaddiema, il-familji, u n-negozji Maltin.
