Għaddiet sena.
Sena ta’ deċiżjonijiet u riformi kbar.
Fil-11 ta’ Jannar 2020, il-membri tal-Partit Laburista vvutaw u l-biċċa l-kbira minnhom għażlu lil Robert Abela biex ikun mexxej tal-Partit Laburista.
F’filmat li tella’ fuq il-midja soċjali, il-mexxej Laburista u Prim Ministru qal li hu kien dejjem onest u saħaq li d-deċiżjonijiet li ħa fl-aħħar xhur se jiswew għall-ġejjieni ta’ dan il-pajjiż.
Il-Prim Ministru Robert Abela stqarr: “Kont onest kif kien il-Gvern li mmexxi u hekk se nibqgħu nkunu. Din kienet sena deċiżiva fejn ħadna numru ta’ deċiżjonijiet kruċjali. Għax żammejna sodi u konna bil-għaqal, id-deċiżjonijiet li ħadna se jgħinuna naħarbu sew ‘il quddiem.”
Il-Prim Ministru Robert Abela qal li fil-ġimgħa fejn jaħbat għeluq l-ewwel sena bħala Kap tal-Gvern, huwa se jibqa’ jkun viċin in-nies.
Dr Abela sostna: “Din il-ġimgħa se nqattagħha qrib tagħkom. Fil-komunitajiet fejn tgħixu u taħdmu. Fuq kollox se nara li sakemm nibqa’ ningħata l-fiduċja, se nkun magħkom u tagħkom. Miegħi tafu fejn qegħdin.”
Intant ħarsa lura lejn id-deċiżjonijiet importanti u diffiċli kemm huma diffiċli li ħa l-Prim Ministru, bla dubju kienu fil-qasam tal-immigrazzjoni.
Fl-eqqel ta’ pandemija, f’Mejju li għadda, il-Prim Ministru Robert Abela mar il-Libja.
Fi Tripli kellu taħdidiet mal-Prim Ministru Fayez al-Sarraj.
Ftit tal-ġimgħat wara kien imiss lill-Prim Ministru Libjan biex jiġi f’Malta u f’pajjiżna ġie inawgurat ċentru ta’ kordinament bejn Malta u l-Libja biex jiġi miġġieled it-traffikar uman.
Fl-istess żmien, kien hemm min qed jipprova jitfa’ l-ħabs lill-istess Prim Ministru, lill-Brigadier tal-Armata u lis-suldati.
Inkjesta Maġisterjali ġabet fix-xejn l-allegazzjonijiet ta’ qtil ta’ immigranti li saru mill-Avukat u Kelliem tal-Oppożizzjoni għall-Ġustizzja Jason Azzopardi.
L-inkjesta mhux biss ġabet fix-xejn dawn l-allegazzjonijiet iżda saħansitra faħħret ħidmet l-armata li ssalva l-ħajjiet.
L-amministrazzjoni ta’ Robert Abela insistiet bil-qawwi fuq solidarjetà fil-prattika mal-bqija tal-Unjoni Ewropea u tressqu proposti tanġibbli għal azzjoni fil-Mediterran, fil-Libja u fil-pajjiżi t’oriġini ħalli l-kwistjoni tal-immigrazzjoni tiġi indirizzata mill-għeruq.
