Il-kanzunetta ġdida ‘From The Heart’ hi miktuba mill-awtur Malti Michael Piscopo u komposta mill-mużiċista Daniż Mads Granum. B’din il-kanzunetta hi interpretata minn Emilie Schiott, li hi wkoll mid-Danimarka.
Fi stqarrija ntqal kif fl-era diġitali, m’għadx hemm bżonn li wieħed ikun fl-istess kamra biex jaħdem ma’ ħaddieħor fuq proġett. Eżempju ċar ta’ dan huma l-kollaborazzjonijiet mużikali li aktar u aktar ta’ spiss qed iseħħu bejn artisti li jgħixu ‘l bogħod minn xulxin.
Michael Piscopo qal li l-kollaborazzjoni bdiet meta wieġeb għal talba għall-kittieba tal-lirika li dehret fuq sit apposta. Minn dakinhar, kollox sar permezz tal-email u l-Internet.
Il-kanzunetta fuq still pop-folk u b’laqtiet jazz titratta t-tema ta’ kemm hu importanti li wieħed ikollu t-tama f’qalbu; li minkejja d-diffikultajiet, laffarijiet jistgħu jaqilbu għall-aħjar u li s-saħħa biex wieħed ibiddel ir-rotta tinsab ġo fina stess.
‘From The Heart’ tinsab fuq Spotify, Apple Music, YouTube u pjattaformi mużikali oħra.
