Fit-tieni kwart ta’ din is-sena, bejn April u Ġunju, in-numru ta’ turisti f’pajjiżna laħħaq is-sitta u tmenin fil-mija tal-livelli tas-sena ta’ qabel il-pandemija.
Dan ħareġ fi stħarriġ li sar mill-Assoċjazzjoni Maltija għal-Lukandi u r-Ristoranti, l-MHRA, li fih ħarġu ċifri ta’ kemm kienu mimlijin il-lukandi u l-istabbilimenti turistiċi f’pajjiżna matul l-ewwel nofs ta’ din is-sena.
F’dan il-perjodu, in-numru ta’ turisti fl-akkomodazzjonijiet turistiċi f’pajjiżna, laħħaq il-ħamsa u sebgħin fil-mija tan-numri li ntlaħqu fl-elfejn u dsatax.
Dan hekk kif bejn Jannar u Ġunju li għadda, kien hawn aktar minn disa’ mitt elf turist fl-akkomodazzjonijiet turistiċi ta’ pajjiżna. Fl-istess perjodu tal-elfejn u dsatax, kien hawn miljun u mitejn elf turist.
Minn dan ir-rapport ħareġ kif bħalissa, turist f’Malta qed jonfoq medja ta’ mija u disa’ ewro kuljum fil-lukandi, li huwa ftit inqas minn dak li kien irreġistrat fis-sena ta’ qabel il-pandemija.
In-nefqa bejn Jannar u Ġunju ta’ din is-sena kienet ta’ kważi sitt mija u sebgħin miljun ewro (€670 miljun).
Dwar dan tkellimna ma’ Raphael Aloisio, mill-kumpanija Deloitte, li ħadet ħsieb dan l-istħarriġ.
Qal, “Ir-riżultati li rajna jew ir-risposti tas-survey li rajna juru li għal Lulju u Awwissu huma pożittivi. In-nies jaf kif ikunu aħjar mit-tieni kwart tas-sena. Naħseb l-iżjed sfida li għandna ovvjament, li hija xi ħaġa out of our control li għandha x’taqsam mal-cancellations li qed isiru, minħabba affarijiet li huma relatati mal-affarijiet tal-aviation industry.” (28 secs)
Fir-rapport ħareġ ukoll kif fit-tieni kwart tas-sena, ir-rata ta’ okkupanza fil-lukandi ta’ tliet stilel kienet ta’ kważi disgħa u sebgħin fil-mija, fil-lukandi ta’ erba’ stilel kienet ta’ kważi tnejn u tmenin fil-mija u fil-lukandi ta’ ħames stilel, ftit iżjed minn tnejn u sittin fil-mija.
Il-Kap Eżekuttiv tal-MHRA, Andrew Agius Muscat saħaq kif hemm irkupru b’saħħtu f’dan is-settur, iżda hemm ukoll sfidi ġodda.
Qal, “Rajna li matul l-ewwel sitt xhur ta’ din is-sena, ir-recovery kienet waħda steady. Qegħdin naraw ukoll li anki matul ix-xhur tas-sajf hemm recovery li qiegħda fit-triq it-tajba. Ovvjament għadna ma rbaħniex il-battalja, jidher ukoll li hemm sfidi ġodda, apparti l-esperjenza tal-pandemija, għandna sfidi ġodda, speċjalment dawk marbutin mal-konnettività, jiġifieri l-ajruplani li jiġu lejn gżiritna.” (26 secs)
Il-President tal-MHRA, Tony Zahra, tkellem dwar il-bżonn li kull min jaħdem fis-settur turistiku, jiġbed ħabel wieħed biex is-settur ikun sostenibbli u aktar innovattiv.
