Għax-xahar ta’ Marzu, ir-ristoranti se jkunu jistgħu jibqgħu miftuħa sa nofsillejl iżda l-bars u l-każini se jibqgħu magħluqa.
Ħabbar dan id-Deputat Prim Ministru u Ministru għas-Saħħa Chris Fearne waqt konferenza tal-aħbarijiet hekk kif kien qed jiġi mistoqsi mill-ġurnalisti.
Fil-fatt, Fearne spjega li wara li tkellem mal-Prim Ministru Robert Abela huwa ffirma avviż legali li mistenni jiġi ppubblikat f’qasir żmien.
Id-Deputat Prim Ministru qal, “Jien għadni kif infurmajt lill-Prim Ministru u għadni kif iffirmajt legal notice li se tkun ippubblikata bejn illum u għada li ħa tkun qed testendi li għax-xahar li ġej il-każini u l-bars mhux se jkun miftuħa. Min-naħa l-oħra, ir-restaurants aħna konna għidna li għal Frar ħa jkunu obbligati li jagħlqu fil-11:00pm. Issa mill-ewwel ta’ Marzu se jkunu obbligati li jgħalqu f’12am.”
Id-Deputat Prim Ministru spjega wkoll li se jitneħħew ċertu miżuri ristrettivi fi djar tal-anzjani li jkunu laqqmu aktar minn 90% tar-residenti bit-tieni doża kontra l-Covid-19.
Huwa sostna: “Fil-ġranet li ġejjin anke billi jkun qiegħed iħabbar dar, dar il-ministeru tal-anzjanità, dawk il-persuni li huma residenti fid-djar tal-anzjani fejn aktar minn 90% tar-residenti ħadu t-tieni doża u għaddew 10 ijiem biex b’hekk l-immunità tkun waslet fil-massimu tagħha ħa nneħħu l-miżuri ta’ shielding. Dan ifisser li mhux se jibqa’ dawk il-miżuri fejn wieħed ma jistax iżur l-qraba tiegħu, fejn l-anzjani ma jistgħux jitħalltu ma’ xulxin imma ħa nkunu qegħdin anke riżultat tas-suċċess fil-vaċċinar ta’ dawn l-age groups ħa nkunu qed inneħħu dawn il-miżuri.”
Qal ukoll li t-tilqim qed jaħdem u skont evidenza ċara, dawk li qed jieħdu anki t-tieni doża, mhux jidħlu l-isptar minħabba l-virus.
Dwar ċertu numri ta’ infezzjonijiet f’dawn l-aħħar jiem, il-Ministru għas-Saħħa spjega li fiċ-ċifri qed jiżdiedu il-każijiet pożittivi li qed jinqabdu bit-testijiet li jagħtu riżultat fi ftit minuti, magħrufa bħala rapid tests.
Qal li dawn il-każijiet jammontaw għal 15%.
Qal li 8% tal-każijiet huma mill-varjant Ingliż u r-rata ta’ intraċċar għal dan it-tip ta’ varjant hija ta’ 13%. Din ir-rata ta’ intraċċar hija ferm iktar minn dak rakkomandat, li hija 5%.
F’dan il-kuntest Chris Fearne żied jgħid ukoll li studju li sar fl-Iskozja fost aktar minn 5 miljun persuna, juri li l-ewwel doża tal-vaċċin tal-AstraZeneca hija effettiva 94%, kontra l-varjant Ingliż.
Saħaq li t-Tlieta wasal parir mill-kumitat xjentifiku dwar l-imxija li l-vaċċin tal-AstraZeneca jista’ jintuża fuq persuni taħt il-65 sena flok fuq persuni li għandhom inqas minn 55 sena.
B’hekk din id-direttiva l-ġdida se tidħol fis-seħħ minn għada biex aktar nies jibdew jitlaqqmu anki bil-vaċċin tal-AstraZeneca.
Intant fil-programm Pjazza mxandar fuq ONE, id-Deputat Prim Ministru qal wkoll li fil-jiem li ġejjin dawk bejn 75 u 80 sena se jibdew jirċievu l-istedina biex jitlaqqmu.
Id-Deputat Prim Ministru ħabbar: “Dawk il-persuni ta’ bejn il-75 sena u t-80 sena ħa jibdew jirċievu l-invit tat-tilqima u l-appuntament biex minn ħmistax oħra jibdew jieħdu t-tilqima huma wkoll, jiġifieri mhux biex dawk ta’ ‘l fuq minn 80 sena imma issa se nibdew il-grupp ta’ bejn il-75 u t-80 sena.”
