Floriana serrħu rashom mit-tliet punti sa tmiem l-ewwel taqsima hekk kif diġá kienu bnew vantaġġ ta’ tliet goals meta huma għelbu lil Zabbar SP bl-iskor ta’ 3-0. Huma ddominaw il-partita għal ħinijiet twal, bl-andament tal-partita jonqos ferm fit-tieni taqsima hekk kif il-Greens kienu ilhom assigurati mir-rebħa li kienet l-ewwel waħda tal-istaġun wara żewġ draws kontra Melita u Birkirkara.
Il-Greens fetħu l-iskor proprju fl-ewwel periklu li ħolqu wara biss ħames minuti meta minn cross ta’ Thiaguinho, Vinicius De Paixa fit-tentattiv li jbiegħed il-ballun ‘il bogħod minn kull periklu, tefa’ fil-lasta tiegħu stess biex b’hekk irriżulta auto-goal sfortunat.
Zabbar wieġbu fit-12-il minuta meta Brian Ariel Gambarte għadda tajjeb lejn Diogo Joao li indirizza l-ballun lejn il-lasti avversarji iżda pront kien Carlo Zammit Lonardelli li tajjar il-ballun minn fuq il-linja, bl-istess difensur tal-Greens deher li weġġa’ xi ftit f’din l-azzjoni.
Izda kienu Floriana li rduppjaw l-iskor erba’ minuti wara meta l-captain Dunstan Vella żmarka lil KYRIAN NWOKO u wiċċ imb’wiċċ mal-goalkeeper ta’ Zabbar, Matthew Grech, b’ċerta eleganza tefa’ l-ballun fix-xibka.
Huma komplew jiddettaw il-logħob u fil-21 minuta, wara li rċieva minn freekick ta’ Jake Grech, Matias Nicolas Garcia, kellu d-daqaa ta’ ras tiegħu mill-viċin tintemm ftit barra.
Kulma jmur kompla d-dominju tal-Greens u fl-24 minuta għamluhom tlieta meta Alexandros Kouros xeħet through pass lejn FRANKLIN SASERE li antiċipa l-ħarġa difettuża ta’ Matthew Grech u permezz ta’ daqqa ta’ ras preċiża tefa’ ġawwa b’Jake Micallef jonqos ukoll milli jtajjar il-ballun minn fuq il-linja.
Il-partita kompliet ikkaratterizzata minn ħafna logħob f’nofs il-ground biex sat-tmiem l-ewwel taqsima r-riżultat ma’ inbidilx.
Dan sal-65 minuta meta Fernandinho dejjem għal Floriana xeħet cross fid-direzzjoni ta’ Alejandro Garzia iżda dan tal-aħħar naqas li jagħmel kuntatt mal-ballun, bl-azzjoni tisfuma fix-xejn.
Zabbar wieġbu fis-77 minuta meta Zachary Grech wara li rċieva mingħand Barros Santos kellu x-xut ċentrali tiegħu minn ġol-kaxxa jiġi salvat bi bravura mill-goalkeeper ta’ Floriana, Christtoffer Mafoumbi.
Huma komplew fuq l-offensiva u fid-89 minuta Barros Sastos kellu l-konklużjoni fil-baxx tiegħu tiġi salvata minn Mafoumbi b’siequ minn mal-art.
Floriana komplew jamministraw il-vantaġġ komdu li kellhom sa tmiem il-partita.
Referee: Philip Farrugia
Plejer tal-Logħba: Matias Nicolas Garcia (Floriana FC)
