Floriana komplew jikkonvinċu bis-sħiħ meta għelbu l-isfida ta’ Balzan bl-iskor ta’ 3-0, bit-tliet goals għalihom jaslu fit-tieni taqsima. B’hekk huma għadhom jokkupaw il-quċċata tal-klassifika bi 12-il punt, fejn ta’ nota huwa l-fatt li f’erba’ partiti skorjaw xejn inqas minn 11-il goal, u ma sofrew l-ebda goal.
Kienu l-Greens li ħarġu fuq l-offensiva u fit-tmien minuta Kemar Reid għadda tajjeb lejn Jose Ulises Arias fuq il-lemin bit-tentattiv ta’ dan jintemm ftit barra.
Huma komplew jippressaw u tliet minuti wara Garcia serva fuq platt tal-fidda lil Reid fuq ix-xellug iżda kien sfortunat meta laqat il-mimduda.
Balzan wieġbu fit-28 minuta meta wara li rċieva minn cross mil-lemin ta’ Paul Fenech, xutt mill-ewwel ta’ Leonardo intemm għoli.
Fl-44 minuta Jose Ulises Arias indirizza cross li sab lil Matheus Souza li kellu d-daqqa ta’ ras tiegħu mill-viċin tintemm barra.
Floriana rnexxielhom jiftħu l-iskor fit-63 minuta meta Adam Magri Overend indirizza cross mil-lemin lejn Kemar Reid li permezz ta’ daqqa ta’ ras preċiża għeleb lill-goalkeeper ta’ Balzan, Danilo Golovic.
Balzan resqu viċin li jġibu l-iskor indaqs fis-70 minuta meta Triston Caruana xeħet cross mil-lemin lejn Da Souza li min-naħa tiegħu bir-ras għadda lejn Andre Prates li kellu x-xutt mill-ewwel tiegħu jintemm għoli. Tliet minuti wara, Peter Olawale dejjem għal Balzan, kellu d-daqqa ta’ ras tiegħu tintemm għoli wara li rċieva minn corner ta’ Triston Caruana.
Madankollu, Floriana rduppjaw l-iskor fis-77 minuta meta rebħu penalty. Dan meta Matheus Souza twaqqa’ fil-kaxxa minn Momcilo Raso u mill-11-il metru, Jose Ulises Arias ma żbaljax.
Fil-85 minuta, Floriana ssiġillaw ir-rebħa permezz tat-tielet goal meta Kemar Reid daħal fil-kaxxa u għadda l-ballun lejn is-sostitut Mattia Veselji, li kien ilu biss tliet minuti fil-ground, u li mill-viċin tefa’ ġewwa.
U biex l-affarjiet ikomplu ġejjin ħażin għal Balzan, fit-88 minuta huma spiċċaw jilgħabu bi player inqas meta tkeċċa għalihom permezz ta’ karta ħamra diretta Andre Prates, wara li waqqa’ li Dunstan Vella eżattament barra l-kaxxa.
Mill-freekick li li rriżulta mogħti minn Carlo Zammit Lonardelli, difensur ta’ Balzan miss il-ballun b’idu fil-kaxxa, u r-referee Ishmael Barbara kien pront u ordna penalty ieħor. Madankolu, it-tenattiv mill-11-il metru ta’ Kemar Reid ġie newtralizzat minn Golovic, biex b’hekk l-attakkant tal-Greens ġie mċaħħad milli jirreġistra doppjetta personali.
Referee: Ishmael Barbara
BOV Plejers tal-Logħba: Jose Ulises Arias
