Dak li huwa magħruf bħala d-derby l-antik ta’ Malta’ ntrebaħ minn Floriana meta għelbu lil Sliema Wanderers bl-iskor ta’ 2-0, biż-żewġ goals għalihom jaslu fit-tieni taqsima. Riżultat li huwa xi ftit kiefer ma’ Sliema hekk kif anke huma kellhom il-mumenti tagħhom li fihom setgħu anke huma marru fil-vantaġġ.
Kienu l-Wanderers li ħarġu fuq l-offenisva u wara biss erba’ minuti Myles Beerman minn throw-in għadda tajjeb lejn Geoffrey Edwin Achempong li min-naħa tiegħu serva fuq platt tal-fidda lil Vito Plut li kellu x-xutt tiegħu minn pożizzjoni ideali jintemm għoli. Fil-11-minuta Denis Koauo, dejjem għal Sliema, għadda tajjeb lejn Geoffrey Edwin Acheampong li kellu x-xutt fil-baxx mid-distanza tiegħu jintemm ftit barra.
Floriana wieġbu għall-ewwel darba fil-25 minuta meta minn azzjoni ta’ corner, qamet taħwida fil-kaxxa, bil-ballun jintemm għand Adam Magri Overend li venven xutt mill-viċin, bil-ballun jaħbat max-xibka minn barra biex ta l-illużjoni tal-goal.
Sliema reġgħu ħolqu l-periklu fit-32 minuta meta Myles Beerman minn throw-in għadda tajjeb lejn Geoffrey Edwin Acheamppong li min-naħa tiegħu qassam lil Vito Plut li kellu l-konklużjoai tiegħu tintemm ftit barra.
Mill-azzjoni li segwiet fuq in-naħa l-oħra tal-pitch, minuta biss wara, Floriana rebħu penalty meta Denis Kouao waqqa’ lil Matheus Nogureira fil-kaxxa. Mill-11-il metru, inkariga ruħu Jose Ulises Arias li iżda kellu x-xutt fil-baxx tiegħu jistampa ma’ sieq il-wieqfa, bid-difiża tal-Wanderers tikklerja l-ballun f’corner.
L-ewwel mumenti tat-tieni taqsima kienu ferm kwieta u nieqsa minn kull emozzjoni, ikkaraterizzati minn ħafna logħob f’nofs il-ground. Dan sat-72 minuta, meta Floriana fetħu l-iskor, meta Kemar Reid bidel il-ballun ma’ Kyrian Nwoko bl-istess Kemar Reid mil-viċin jitfa’ ġewwa. Huma komplew jagħfsu u erba’ minuti wara rduppjaw l-iskor biex issiġillaw ir-rebħa meta Owne Spiteri, wara li rċieva minn azzjoni ta’ corner, kien fil-post it-tajjeb u permezz ta’ daqqa ta’ ras mill-viċin ma ta l-ebda ċans lill-goalkeeper tal-Wanderers, Rashed Al Tumi sabiex isalva.
Referee: Ishmael Barbara
Plejer tal-Logħba; Kemar Reid (Floriana FC)
