F’partita pjaċevoli, Floriana kisbu rebħa meritata ta’ 2-1 fuq Gzira U., bit-tliet goals jaslu proprju fl-ewwel taqsima. Il-Greens kellhom lill-Oualid El Hasni sospiż.
Huma fetħu l-iskor proprju fl-ewwel periklu li ħolqu fis-seba’ minuta permezz ta’ xutt sabiħ u b’saħħtu minn ġol-kaxxa ta’ JAKE GRECH b’dan ikun l-ewwel goal staġjonali tiegħu.
Huma komplew jiddettaw il-logħob u fit-13-il minuta wara li rċieva minn freekick qasir Alexander Kouro kellu l-konklużjoni tiegħu tintemm ftit barra.
Kulma jmur kompla d-dominju assolut tal-Greens u erba’ minuti wara Jake Grech iporova jqabbeż il-ballun minn fuq il-goalkeeper veteran tal-Maroons Justin Haber, iżda l-ballun intemm ftit għoli.
Gzira wieġbu għall-ewwel darba fis-17-il minuta meta Kevin Tulimieri qabeż tajjeb difensur avversarau iżda kellu x-xutt tiegħu fjakk wisq u ġie salvat mingħajr diffikultá minn mal-art mill-goalkeeper ta’ Floriana, Christoffer Mafoumbi.
Huma komplew fuq l-offensiva u man-nofsiegħa logħob Thaylor Aldama xeħet cross fid-direzzjoni ta’ Alex da Paixao Alves li kellu d-daqqa ta’ ras tiegħu tintemm ftit għoli.
Il-Maroons reġgħu ħolqu l-periklu fit-38 minuta u kellhom ferħa bla temma meta Kevin Tulimieri indirizza cross lejn Alex Da Paixao Alves li min-naħa tiegħu serva lil Faysal Hassany li minn taħt il-lasta tefa’ ġewwa, iżda r-referee Philip Farrugia kien pront u ħassar dan il-goal minħabba offside.
Iżda Gzira ma kellhomx jiġu mċaħħda fil-41 minuta permezz ta’ GABRIEL BOHRER MENTZ meta l-ewwel kellu d-daqqa ta’ ras tiegħu imblukkata mid-difiża tal-Greens biex mir-rebound spara l-ballun fix-xibka, b’dan ikun it-tielet goal tiegħu matul dan l-istaġun.
Gżira bilkemm kellhom ċans jifirħu għal dan il-goal għaliex żewġ minuti wara Floriana reġgħu marru fil-vantaġġ meta CARLO ZAMMIT LONARDELLI venven xutt mid-distanza li ħasad għal kollox lil Justin Haber li nqabad ftit barra minn postu, bil-ballun jaħbat mal-wieqfa qabel intemm ġewwa.
Floriana resqu qrib it-tielet goal fl-64 minuta meta l-ewwel Kemar Reid kellu xutt mill-viċin salvat minn Haber, biex mir-rebound, Matias Nicolas Garcia falla l-mira.
Huma komplew jippressaw u erba’ minuti wara, Kemar Reid kellu l-konklużjoni tiegħu li ntemmet għoli.
Il-Greens komplew jamministraw il-vantaġġ minimu li kellhom sa tmiem il-partita.
Referee: Philip Farrugia
Player tal-Logħba: Carlo Zammit Lonardelli (Floriana FC)
