Floriana kisbu l-passaġġ għar-round tal-aħħar 16 tal-Meridianbet FA Trophy meta għelbu l-isfida ta’ Xewkija Tigers bl-iskor ta’ 2-0, bil-gowls għalihom jaslu wieħed f’kull taqsima.
Kien biss fil-35 minuta li waslet l-ewwel azzjoni denja ta’ nota, bi Floriana jkunu huma li joħolqu l-periklu meta wara li rċieva minn azzjoni ta’ corner, FERNANDINHO, venven xutt sabiħ u angulat minn barra l-kaxxa li ma ta l-ebda ċans lill-goalkeeper ta’ Xewkija Tigers, Nikola Kosanin.
U f’botta u risposta, mill-azzjoni li segwiet minuta biss wara, Xewkija Tigers kienu għoddhom ġabu l-iskor indaqs meta l-Arġentin Brian Parada kellu t-tentattiv tieghu mill-viċin jistampa ma’ sieq il-wieqfa, biex mir-rebound, l-istess player tefa’ barra, bil-Greens jeħilsuha ħafif.
L-azzjoni sussegwenti waslet fit-52 minuta bil-Greens ikunu huma li joħolqu l-periklu meta Matias Nicolas Garcia ittestja lil Kosarin permezz ta’ xutt minn tarf il-kaxxa, bl-istess goalkeeper tat-Tigers, isalva tajjeb.
Huma komplew fuq l-offensiva u fis-66 minuta, wara li rċieva minn clearance qasira minn cross ta’ Matias Nicolas Garcia, Gonzalo Julian Gamarra, kellu l-konklużjoni b’saħħitha tiegħu newtralizzata minn Kosanin.
Xewkija Tigers bdew jipproduċu logħob sabiħ u fit-73 minuta minn clearance qasira ta’ difensur ta’ Floriana, il-ballun intemm għand Stefan Cassar, li niżżel il-ballun b’sidru qabel kellu x-xutt tiegħu minn ġol-kaxxa jintemm ftit għoli.
Minuta biss wara, Franklin Sasere, wara li rċieva minn cross ta’ Gamarra, kellu d-daqqa ta’ ras tiegħu tintemm barra.
Huma ssiġillaw ir-rebħa permezz tat-tieni goal fil-ħin miżjud meta wara li rċieva minn cross preċiz ta’ Matias Niacolas Garcia, FRANKLIN SASERE, kien fil-post it-tajjeb fil-mument opportun u permezz ta’ daqqa ta’ ras preċiża mill-viċin tefa’ ġewwa.
Floriana komplew jamministraw il-vantaġġ doppju li kellhom sa tmiem il-partita.
Referee: Daniel Portelli
