Floriana komplew jikkonvinċu bis-sħiħ u ftit li xejn tħabtu biex għelbu l-isfida ta’ Naxxar Lions bl-iskor kbir ta’ 4-0, f’partita li huma ddominaw mill-bidu sat-tmiem, b’Naxxar jidhru mingħajr ideat tul id-90 minuta, fejn lanqas ħolqu azzjoni waħda denja ta’ nota.
Kienu proprju l-Greens li ħolqu l-ewwel periklu fis-seba’ minuta meta Carlo Zammit Lonardelli żmarkat xeħet pass lejn Franklin Sasere izda dan m’għamilx kuntatt mal-ballun, bl-azzjoni tisfuma fix-xejn.
Fid-19-il minuta il-coach ta’ Naxxar George Vella kien kostrett jaffettwa sostituzzjoni sfurzata meta weġġa’ għalihom il-player żagħżugħ Neil Pace Cocks biex minfloku daħal jilgħab is-sostitut Giuseppe Bonanno.
Il-Greens fetħu l-iskor żewġ minuti biss wara meta l-ewwel Jake Grech kellu xutt salvat parzjalment mill-goalkeeper ta’ Naxxar Matthias Debono, biex mir-rebound CARLO ZAMMIT LONARDELLI kien pront u minn taħt il-lasta tefa’ ġewwa.
Huma komplew fuq l-offensiva u fit-32 minuta Franklin Sasere mill-viċin kellu konklużjoni ferm erratika li ma ħolqot l-ebda periklu għad-difiża Naxxarija.
Kulma jmur kompla d-dominju assolut tal-Greens u fit-43 minuta rduppjaw l-iskor meta wara li rċieva minn freekick ta’ Jake Grech, OWEN SPITERI, b’xamma kbira għall-goal tefa’ ġewwa.
Fil-ftuħ tat-tieni taqsima Floriana komplew bl-istess ritmu tal-ewwel waħda u fit-52 minuta għamluhom tlieta meta f’azzjoni maħduma bizzila, il-ballun wasal għand FRANKLIN SASERE li mill-viċin spara ġewwa.
Sitt minuti wara, huma kellhom f’saqajhom il-ballun tar-raba’ goal iżda Jake Grech kellu xutt mill-ewwel mill-viċin li ntemm ftit barra.
Kompliet ix-xalata ta’ goals tal-Greens meta fit-68 minuta skorjaw ir-raba’ goal meta FRANKLIN SASERE permezz ta’ xutt minn pożizzjoni ideali tefa’ ġewwa, biex b’hekk irreġistra doppjetta personali.
U jidher li huma ma kinux kuntenti biżżejjed b’dan l-iskor hekk kif komplew bl-ssedju tagħhom fuq il-lasti avversraji u fit-80 minuta Franklin Sasere kellu xutt mill-viċin salvat tajjeb minn Matthias Debono.
Erba’ minuti wara l-istess Sasere kelu xutt mill-viċin salvat minn Debono, biex mir-rebound, l-istess player li kellu partita mill-aqwa kellu l-konklużjoni tiegħu tiġi salvata minn Debono mgħejjun mill-mimduda.
Floriana komplew jamministraw il-vantaġġ komdu li kellhom sa tmiem il-partita.
Referee: Alex Johnson
Plejer tal-Logħba: Franklin Sasare (Floriana FC)
