Floriana kisbu rebħa meritata ta’ 2-0 fuq Mosta, biiż-żewġ goals għalihom jaslu fit-tieni taqsima.
Ta’ nota huwa l-fatt li din kienet il-200 partita għar-referee Fyodor Zammit fl-ogħla diviżjoni tal-football Malti.
Fit-tmien minuta il-kowċ ta’ Floriana Darren Abdilla kien kostrett jaffettwa sostituzzjoni sfurzata hekk kif weġġa’ għalihom il-player Carlo Zammit Lonardelli li deher li ġibed il-hamstring biex minfloku daħal jilgħab is-sostitut Guy Serge Cedric Yameogo.
Kien biss fit-18-il minuta li waslet l-ewwel azzjoni denja ta’ nota fil-partita meta xutt fil-baxx mid-distanza ta’ Matias Nicolas Garcia ġie salvat minn mal-art mill-goalkeeper ta’ Mosta, David Udoh Akpan.
Mosta wieġbu tliet minuti biss wara permezz ta’ xutt ieħor mid-distanza din id-darba ta’ Richard Luca li ġie salvat mingħajr wisq diffikultá mill-goalkeeper tal-Greens, Christoffer Mafoumbi.
Floriana reġgħu ħolqu l-periklu fit-22 minuta meta Franklin Sasere indirizza cross fid-direzzjoni ta’ Thiaguinho li kellu x-xutt mill-ewwel tiegħu jintemm ftit barra.
Iżda kienu Mosta li resqu viċin li jiftħu l-iskor żewġ minuti wara meta Joshua Agmeyang għadda tajjeb lejn Sunday Okereke li avvanza tajjeb, ġie wiċċ imb’wiċċ ma’ Mafoumbi iżda ra lil dan tal-aħħar idawwar tajjeb f’corner wara li ħareġ minn postu.
Huma komplew fuq l-offensiva u fit-38 minuta, konklużjoni mid-distanza ta’ Leonardo Da Silva ġiet salvata parzjalment minn Mafoumbi, biex mir-rebound Nathan Agius kellu d-daqqa ta’ ras tiegħu pjuttost fjakka u ġiet salvata mingħajr diffikultá minn Mafoumbi.
Floriana fetħu l-iskor fis-57 minuta meta wara li rċieva minn freekick, KEMAR REID żmarkat għal kollox u permezz ta’ daqqa ta’ ras preċiża tefa’ ġewwa, fost id-delirju ta’ ferħ tal-partitarji numerużi Furjaniżi.
Huma komlew jiddettaw il-logħob u fl-64 minuta, xutt insidjuz ta’ Jake Grech minn ġol-kaxxa ġie salvat minn mal-art minn Akpan.
Żewġ minuti wara Kemar Reid kellu f’saqajh it-tieni goal għal Floriana iżda għamel l-impossibli u minn qagħda ferm ideali mar iktar għas-saħħa milli għall-preċiżjoni u tefa’ għoli.
U fl-84 minuta reġa’ kien Kemar Reid li falla ċans inkredibbli ta’ skor meta wara li rċieva mingħand Jake Grech, minn taħt il-lasta tefa’ inkredibbilment barra.
Dan sabiex erba’ minuti wara il-Greens kellhom ferħa bla temma meta Franklin Sasere mill-viċin tefa’ ġewwa, iżda r-referee Fyodor Zammit kien pront u ħassar dan il-goal minħabba offside.
Fil-ħin miżjud Floriana rebħu penalty meta Jake Grech twaqqa’ minn Joao Teixeira fil-kaxxa. Mill-11-il metru inkariga ruħu FRANKLIN SASERE li ma żbaljax hekk kif permezz ta’ xutt fil-baxx tefa’ l-ballun naħa u lil Akpan in-naħa opposta.
Referee: Fyodor Zammit
Plejer tal-Logħba: Kemar Reid (Floriana FC)
