Floriana kisbu rebħa ta’ 2-0 kontra Hibernians, bil-goals għalihom jaslu wieħed f’kull taqsima. B’hekk il-Greens laħqu momentarjament lil Hamrun Spartans fil-quċċata tal-klassifika, bl-Ispartans ikunu impenjati proprju għada kontra Gudja United.
Għalkemm Floriana kisbu l-punti massimi, ta’ min wieħed isemmi li Hiberians offrewlhom oppożizzjoni denja tul id-90 minuta, speċjalment fl-ewwel taqsima, fejn laqtu wkoll il-wieqfa, permezz ta’ Giannis Bastianos.
L-ewwel azzjoni perikoluża waslet fit-12-il minuta b’Hibernians ikunu huma li joħolqu l-periklu meta Jurgen Degabriele avvanza tajjeb iżda ra lill-goalkeeper Bulgaru ta’ Floriana Georgi Kitanov idawwar tajjeb f’corner. Huma komplew jippressaw u sitt minuti wara, Ferdinando Apap kellu xutt mill-ewwel fil-kaxxa minn ġol-kaxxa jintemm barra.
Floriana wieġbu fil-25 minuta permezz ta’ xutt insidjuż ta’ Alexandros Kouro li ġie salvata mill-goalkeeper ta’ Hibernians, Ibrahim Kone. II-Pawlisti reġgħu ħolqu l-periklu ħames miniuti wara meta Jurgen Degabriele minn pożizzjoni ferm ideali għamel l-impossibli u kkonkluda barra.
Kulma jmur il-ħin Hibernians bdew jipproduċu logħob sabiħ u fl-40 minuta il-Grieg Giannis Bastianos ittanta xortih permezz ta’ xutt mid-distanza li iżda stampa mal-wieqfa, bil-Greens jeħilsuha ħafif.
Iżda kontra x-xejra tal-logħob kienu Floriana li fetħu l-iskor fl-44 minuta meta s-sostitut Willie Furtado indirizza cross-shot għan-nofs li sab lil Kemar Reid li minn taħt il-lasta tefa’ ġewwa.
Fil-ftuħ tat-tieni taqsima, Floriana, komplew bl-istess ritmu tal-ewwel waħda u fil-51 minuta, l-awtur tal-ewwel goal tal-Greens, Kemar Reid, kellu x-xutt fil-baxx tiegħu jiġi salvat b’saqajh mill-goalkeeper ta’ Hibernians, Ibrahaim Kone.
Fil-65 minuta Floriana rduppjaw l-iskor meta Matheus De Sousa avvanza tajjeb minn max-xellug, ra lil Kone barra minn postu, u permezz ta’ lob delizzjuż, qabbeż il-ballun minn fuq. Il-partita kompliet ikkaratterizzata minn ħafna logħob f’nofs il-ground.
Dan sat-88 minuta meta xutt ta’ Bastianos għal Hibernians sab lil Kitanov attent. Żewġ minuti biss wara Maksim Valadzko għal Floriana ra t-tentattiv tiegħu jistampa mal-wieqfa, bil-Pawlsiti jeħilsuha ħafifa.
Floriana komplew jamministraw il-vantaġġ doppju li kellhom sa tmiem il-partita.
Referee: Glen Tonna
BOV Plejer tal-Logħba: Kemar Reid (Floriana FC)
