Floriana komplew juru biċ-ċar li se jkunu fost l-isfidanti ewlenin għar-rebħ tal-kampjonat meta għelbu lil Hibernians bl-iskor ta’ 2-0 biex kisbu t-tielet rebħa konekuttiva u taw l-ewwel telfa lill-Pawlisti.
Kienet rebħa kollox ma’ kollox meritat għall-Greens, għalkemm wieħed ma jrid ineħħi xejn mill-mertu ta’ Hibernians, li kellhom il-waqtiet pożittivi tagħhom fosthom fl-ewwel taqsima, fejn kienu sfortunati hekk kif laqtu l-wieqfa.
Għall-fini ta’ statistika, ta’ nota huwa l-fatt li sa issa Floriana skorjaw tmien goals, u a ma sofrew l-ebda goal.
Kien biss fil-21 minuta li waslet l-ewwel azzjoni denja ta’ nota, meta xutt fil-baxx mid-distanza tal-ex Hibernians, Dunstan Vella, ġie salvat mingħajr wisq diffikultá minn mal-art mill-goalkeeper tal-Pawlsiti, Ibrahim Kone
Huma komplew jippressaw u fit-38 minuta fetħu l-iskor meta Kemar Reid sab l-ispazju, ġera bil-ballun, u kellu x-xutt verament sabiħ tiegħu mid-distanza jintemm fir-rokna tax-xibka.
Kulma jmur kompla didmiju tal-Greens u fit-42 minuta Valadzko għadda tajjeb lejn Matheus De Sousa li kważi minn fuq il-penalty spot tefa’ inkreddibilment għoli.
Hibernians wieġbu żewġ minuti biss wara meta minn azzjoni ta’ corner, Ferdinando Apap, kompletament żmarkat ra d-daqqa ta’ ras tiegħu taħbat mal-wieqfa bil-Greens jeħilsuha ħafif .
Fit-tieni taqsima, il-partita kompliet tkun waħda ferm tattika u kkaratterizzata minn ħafna logħob f’nofs il-ground, fejn kien biss fit-78 minuta li ġiet innutata l-ewwel azzjoni denja ta’ nota meta minn cross ta’ Adam Magri Overend, Kyrian Nwoko, ma laħaqx il-ballun, bid-difiża Pawlista tikklerja.
Huma komplew jagħfsu u fil-81 minuta, b’Hibernians żbilanċjati għall-aħħar fid-difiża, Floriana kienu għoddhom irduppjaw l-iskor meta Dunstan Vella avvanza tajjeb iżda ra lil Kone idawwar tajjeb f’corner.
Il-Greens komplew fuq l-offensiva u żewġ minuti biss wara, Kyrian Nwoko, kellu x-xutt tiegħu mid-distanza jintemm għoli.
Huma ssiġillaw ir-rebħa permezz tat-tieni goal fis-87 minuta meta Kemar Reid ikkontrolla tajjeb u b’xutt fil-baxx, tefa’ ġewwa, u b’hekk irreġistra doppjetta personali fil-partita.
Referee: Slobodan Petrovic
BOV Plejer tal-Logħba: Kemar Reid (Floriana FC)
