Reazzjoni b’saħħitha f’waqtha rat lil Floriana jdawru telfa f’rebħa ta’ 3-1 kontra SP Tre Penne ta’ San Marino.
Dan hekk kif wara li ġew maħsuda b’goal kmieni fit-tieni taqsima, Floriana, irreaġixxew bl-aqwa mod possibli u skorjaw tliet goals f’temp ta’ tmien minuti.
Kienu Floriana li ħolqu l-ewwel periklu fil-ħames minuta meta freekick ta’ Jake Grech intemm għoli.
Il-Greens komplew jiddettaw il-logħob u fit-12 minuta Jake Grech kellu xutt mid-distanza jiġi devjat f’corner mill-goalkeeper ta’ Tre Penne, Mattia Migani.
SP Tre Penne wieġbu fis-17-il minuta permezz ta’ xutt mid-distanza ta’ Armando Amati li ntemm għoli.
Iżda kienu Floriana li tilfu ċans tad-deheb li jiftħu l-iskor minuta biss wara meta Kemar Reid kellu xutt fil-baxx minn pożizzjoni angolata jiġi salvat minn mal-art minn Migani.
U jekk din kien ċans kbir mitluf għal Floriana, daqstant ieħor kien dak għal Tre Fiori man-nofsiegħa logħob meta xutt minn tarf il-kaxxa ta’ Tommaso Guidi ġie mdawwar f’corner minn mal-art mill-goalkeeper ta’ Floriana, Christoffer Mafoumbi.
Dan sabiex żewġ minuti biss wara Thiaguinho għal Floriana indirizza cross-shot fil-baxx għan-nofs b’Jake Grech jonqos għal ftit milli jagħmel kuntatt mal-ballun.
Il-Greens komplew jippressaw u fl-34 minuta, Jake Grech qabeż tajjeb difensur avversarju fil-kaxxa qabel kellu x-xutt tiegħu mdawwar f’corner minn Migani.
Fil-ftuh tat-tieni taqsima, Tre Penne ħarġu ferm aggressivi u fis-47 minuta resqu ferm viċin li jiftħu l-iskor meta Tommaso Guidi avvanza tajjeb fil-kaxxa u kellu x-xutt tiegħu minn taħt il-lasta jgħaddi ftit barra.
Iżda l-istess player TOMMASO GUIDI ma falliex fil-51 minuta meta l-Greens reġgħu kienu erratiċi fid-difiża u permezz ta’ xutt fil-baxx minn pożizzjoni ideali tefa’ wara Mafoumbi.
Madankollu, Floriana, ma rmewx ix-xugaman u fil-55 minuta ġabu l-iskor indaqs meta Kemar Reid indirizza cross li sab lil KYRIAN NWOKO li permezz ta’ daqqa ta’ ras preċiża tefa’ ġewwa.
Dan il-goal ma ssodisfax biżżejjed il-bżonnijiet tal-Greens li baqgħu jippressaw biex idawru l-iskor favurihom u rnexxielhom jagħmlu dan żewġ minuti biss wara meta Thiaguinho pprovda l-assist lil DUNSTAN VELLA li żmarkat minn tarf il-kaxxa spara l-ballun fis-saqaf tax-xibka.
Huma komplew jiddettaw il-logħob u fit-63 minuta, għamluhom tlieta meta l-ewwel Kemar Reid għadda lejn Jake Grech li kellu t-tentattiv tiegħu salvat minn Migani, bil-ballun jerġa’ jintemm għand Reid li din id-darba indirizza cross għan-nofs li sab lil THIAGINHO li permezz ta’ xutt mill-ewwel fl-arja ma ta l-ebda ċans lil Migani.
Il-partita kompliet ikkaratterizzata minn ħafna logħob f’nofs il-ground, bil-Greens ikomplu jamministraw il-vantaġġ doppju li kellhom sa tmiem il-partita.
Referee: Florian Lata (Albanija)
