Floriana ma setgħux jiċċelebraw aħjar il-festa tal-patrun tagħhom San Publju meta bl-aktar mod konvinċenti għelbu l-isfida ta’ Mosta bl-iskor kbir ta’ 4-0, fejn diġá kienu aċċertati mir-rebħa sa tmiem l-ewwel taqsima, hekk kif diġá kienu tliet goals minn fuq.
B’hekk huma kkonsolidaw posthom fil-quċċata tal-klassifika b’57 punt u meta għad fadal biss tliet partiti għal tmiem l-istaġun, jinsabu fil-pole position għar-rebħ tal-kampjonat.
Floriana għamlu l-intenzjonijiet tagħhom ċari mal-ftuħ tal-partita u wara biss tliet minuti Kemar Reid kellu x-xutt tiegħu mill-viċin jintemm ftit barra.
Huma komplew fuq l-offensiva u erba’ minuti wara Matias Nicolas Garcia kellu x-xutt mid-distanza tiegħu jintemm ftit għoli.
Kulma jmur kompla d-dominju assolut tal-Greens u fit-13-il minuta, Maaksim Valadzko xeħet cross-shot għan-nofs iżda ħadd mill-players sħabu ma rnexxielu jagħmel kuntatt mal-ballun.
Azzjoni wara l-oħra, l-isforzi tal-Greens ġew finalment ippremjati meta fl-20 minuta rebħu penalty hekk kif il-goalkeeper ta’ Mosta David Udoh Akpan waqqa’ lil Matheus De Sousa fil-kaxxa. Mill-11-il metru inkariga ruħu Luis Willis Furtado li ma żbaljax, hekk kif permezz ta’ xutt b’saħħtu tefa’ l-ballun naħa u lil Akpan in-naħa opposta.
U jidher li huma ma kinux kuntenti biżżejjed b’dan l-iskor hekk kif komplew bl-assedju tagħhom lejn il-lasti opposti u fit-32 minuta Maksim Valadzko spara xutt minn tarf il-kaxxa li sab lil Akpan attent.
Erba’ minuti wara huma rebħu penalty ieħor din id-darba meta Armen Hovhannisyan waqqa’ lil Maksim Valadzko fil-kaxxa. Mill-11-il metru reġa’ nkariga ruħu Luis Willis Furtado li reġa’ tefa’ l-ballun fir-rokna tax-xibka, biex b’hekk irreġistra doppjetta personali fost id-delirju ta’ ferħ tal-partitaji numerużi Furjaniżi.
Kompliet ix-xalata ta’ goals minn Floriana meta fit-43 minuta għamluhom tlieta meta minn azzjoni ta’ freekick mogħti minn Carlo Zammit Lonarelli, il-ballun intemm għand Owen Spiteri li minn taħt il-lasta u b’logħob tat-tfal tefa’ ġewwa.
Kuntrarju għall-ewwel taqsima, it-tieni waħda żvolġiet bħala ferm kwieta u nieqsa minn kull emozzjoni.
Dan sal-74 minuta meta Kemar Reid kellu xutt fil-baxx minn pożizzjoni ideali li ġie salvat minn Akpan b’saqajh.
Fis-86 minuta huma kellhom f’saqajhom ir-raba’ goal meta wara taħwida fil-kaxxa, Jake Grech, minn taħt il-lasta tefa’ barra.
Il-Greens issiġillaw ir-rebħa permezz tar-raba’ goal fid-90 minuta meta Matias Nicolas Garcia xeħet cross fil-baxx lejn Jake Grech li kellu x-xutt tiegħu imblukkat minn Akpan, biex mir-rebound, is-sostitut Christos Rovas, spara ġewwa.
Iżda d-drama kienet għadha ma ntemmitx hawn hekk kif proprju fil-ħin mizjud, Mosta spiċċaw jilagħbu b’10 players meta tkeċċa s-sostitut Bradley Farrugia permezz ta’ karta ħamra diretta wara daħla kerha fuq Oualid El Hasni.
Floriana komplew jamministraw il-vantaġġ komdu li kellhom sa tmiem il-partita mingħajr wisq diffikultá.
Referee: Glen Tonna
BOV Plejer tal-Logħba: Willis Furtado (Floriana FC)
