Floriana kisbu rebħa meritata u konvinċenti ta’ 3-0 kontra Sirens, biex laħqu lil Hamrun Spartans fil-quċċata tal-klassifika bi 17-il punt. B’hekk, wara żewġ draws konsekuttivi, huma rritornaw għar-rebħ.
Għall-ħinijiet twal il-Greens iddettaw il-logħob tagħhom, b’Sirens jippruvaw iwettqu reazzjoni u f’xi ħinijiet irnexxielhom jagħmlu dan.
Madankollu, issa bdiet tixgħel il-bozza l-ħamra għat-team minn San Pawl il-Baħar hekk kif baqgħu ankrati fil-qiegħ tal-klassifika flimkien ma’ Santa Lucia b’żewġ punti biss.
Kienu Floriana li ħolqu l-ewwel periklu fit-12-il minuta meta Kemar Reid wara li rċieva minn cross mix-xellug kellu d-daqqa ta’ ras tiegħu salvata tajjeb mill-goalkeeper ta’ Sirens, Andrea Cassar.
Sirens wieġbu fis-36 minuta meta s-sostitut Charles Agyemang temm azzjoni personali billi għadda tajjeb lejn Nicholas Pulis li kellu x-xutt mill-ewwel tiegħu minn tarf il-kaxxa jintemm barra.
Il-Greens tilfu ċans tad-deheb li jiftħu l-iskor fil-45 minuta eżattament qabel tmiem l-ewwel taqsima meta Matheus De Sousa għadda tajjeb lejn Kemar Reid li min-naħa tiegħu indirizza cross fil-baxx lejn Dunstan Vella li kellu x-xutt tiegħu mblukkat mid-difiża tat-team minn San Pawl il-Baħar.
Fil-ftuħ tat-tieni taqsima, Floriana, ħarġu tajjeb u fil-55 minuta Maksim Valadzko mix-xellug għadda tajjeb lejn Leonrdo da Grazia li kellu x-xutt tiegħu minn barra l-kaxxa jintemm barra. Huma komplew jippressaw u seba’ minuti wara meritatament fetħu l-iskor meta minn azzoni ta’ corner mil-lemin, id-difiża ta’ Sirens naqset milli tikklerja l-ballun f’sigurtá, bil-ballun jintemm għand il-captain OUALID EL HASNI li permezz ta’ daqqa ta’ ras minn taħt il-lasta tefa’ ġewwa.
Iżda Sirens ma rmewx ix-xugaman anzi wettqu reazzjoni tajba u fis-70 minuta, xutt sabiħ ta’ Mohammed Akadom ġie salvat mingħajr wisq diffikultá mill-goalkeeper Bulgaru tal-Greens, Georgi Kitanov.
Floriana reġgħu ħolqu l-periklu fl-74 minuta meta freekick insidjuż ta’ Jose Ulises Arias għadda ftit barra.
Huma rduppjaw l-iskor fil-81 minuta meta minn azzjoni personali, KEMAR REID, qabez tajjeb difensur avversarju u b’xamma kbira għall-goal, u permezz ta’ xutt fil-baxx tefa’ ġewwa.
Kulma jmur kompla d-dominju assolut tal-Greens u fid-89 minuta, huma ssiġillaw ir-rebħa permezz tat-tielet goal meta LORENZO DA GRAZIA venven xutt b’saħħtu minn barra l-kaxxa li ma ta l-ebda ċans lil Andrea Cassar, bil-ballun jintemm fis-saqaf tax-xibka.
Sussegwentement, huma baqgħu jamministraw il-vantaġġ komdu li kellhom sa tmiem il-partita.
Referee: Daniel Casha
BOV Plejer tal-Logħba: Oualid El Hasni (Floriana FC)
