• Ir-reazzjoni tal-Iżvediżi wara d-deċiżjoni li l-fond “ta’ Tonio Fenech” jitmexxa minn Awdituri
Kienet ċara r-reazzjoni tal-Aġenzija Żvediza għall-Pensjonijiet dwar id-deċiżjoni li Falcon Funds, li tiegħu hu direttur l-eks Ministru Tonio Fenech, jgħaddi f’idejn awditur biex jamministrah.
“Nilqgħu d-deċiżjoni tal-MFSA. Dan ifisser li sa fl-aħħar il-fond se jkollu tmexxija tajba,” qal il-Kap tad-Dipartiment Legali fi ħdan l-Aġenzija tal-Pensjonijiet Żvediża, Mikael Westberg.
Kien aktar kmieni din il-ġimgħa li l-Awtorità Maltija għas-Servizzi Finanzjarji ħadet deċiżjoni b’rabta mal-Falcon Funds wara xhur ta’ investigazzjoni u ħruġ ta’ numru ta’ direttivi.
L-MFSA ħatret lill-KPMG Malta biex tieħu f’idejha l-assi tal-Falcon Funds. Dan hu fond li s-sena li għaddiet iddomina l-aħbarijiet Żvediżi għax il-mod kif tmexxa gidem mijiet ta’ pensjonanti minn dan il-pajjiż. Fin-nofs hemm iktar minn €230 miljun, tant li tnediet investigazzjoni kriminali b’rabta mal-allegat mod frodulenti li bih flus pensjonanti għaddew għal dan il-fond.
Bid-deċiżjoni li ttieħdet mill-MFSA ifisser li d-diretturi tal-Falcon Funds, fosthom Tonio Fenech, m’għadx għandhom kontroll fuq il-fond.
L-Aġenzija tal-Pensjonijiet fl-Iżvezja, li f’dan il-każ serju investiet enerġija kbira ħadet nifs kbir ma’ din id-deċiżjoni. Għax sa fl-aħħar jidher li qed tikber it-tama li l-pensjonanti jieħdu flushom lura. “Nistennew li jirritornaw il-flus kollha. Dan skont l-ordni li nħarġet fis-sena 2016,” stqarr Westberg mal-gazzetta Kullħadd, li fakkar kif dan kien wieħed minn diversi passi li ttieħdu.
Tant li ordni ta’ fidwa nħarġet mill-Aġenzija Żvediża għall-pensjonijiet skont regolamenti tal-Unjoni Ewropea. U minn dak iż-żmien ’l hawn beda proċess ta’ likwidazzjoni tal-Falcon Funds.
Min-naħa l-oħra, l-investigazzjoni tal-MFSA b’rabta mal-fond kienet ilha għaddejja minn Diċembru tal-2015 u s-sena li għaddiet ħarġet żewġ direttivi. Direttiva minnhom kienet ordni ċara li tal-Falcon Funds iridu jroddu l-miljuni lill-Aġenzija Żvediża għall-pensjonijiet.
“Huwa kruċjali li flushom ikunu mmexxija aħjar. Nħarsu ’l quddiem biex nikkoperaw mal-KPMG li issa hija responsabbli mill-Falcon Funds. Issa se nkunu nistgħu nifhmu aħjar l-assi tal-fond, se jkollna informazzjoni aħjar biex ikun jista’ jitkompla l-proċess ta’ fidwa, jiġifieri li jintraddu lura l-flus. Id-deċiżjoni li ħadet l-MFSA turi li s-sitwazzjoni hija serja ħafna u saret agħar minħabba li kien hemm kriżi fit-tmexxija fil-Falcon Funds għal xhur sħaħ,” sostna Westberg.
Id-deċiżjoni li ħadet l-MFSA hija bżonjuża ħafna biex il-fond minnu nnifsu ma jibqax staġnat. “Il-komunikazzjoni li saret min-naħa tagħna kienet l-aktar mal-Awtorità Żvediża għas-Servizzi Finanzjarji u kuntenti bil-mod kif irreżistew il-każ,” irrimarka Westberg meta mistoqsi dwar kif imxew mal-MFSA.
F’dan il-każ is-suspetti kienu tqajmu fuq kif f’Konsumentkraft, ċentru f’Alicante saru telefonati biex iħeġġu klijenti Żvediżi jgħaddu l-flus tagħhom minn fond privat għall-Falcon Funds.
Dan il-każ ġab insigurtà fost il-pensjonanti Żvediżi u l-awtoritajiet Żvediżi ħaduh tant b’serjetà li l-Pulizija Żvediża għamlet rejd fl-uffiċini minn fejn saru t-telefonati. Mhux biss, l-investigazzjoni li saret kienet ixxandret fi programmi investigattivi fl-Iżvezja.
Fuq kollox, Westberg stqarr li l-każ tal-Falcon Funds wassal biex l-aġenzija tkun iżjed attenta meta tiġi biex taċċetta fondi ġodda fis-sistema ta’ tfaddil tal-pensjonijiet. Fil-fatt, l-aġenzija Żvediża għall-pensjonijiet qed tagħmel skrutinju iżjed rigoruż u tara li kull fond, irrelevanti l-pajjiż li ġej minnu, jilħaq il-kriterji meħtieġa. “Għaldaqstant qed nittrattaw kull fond b’mod indaqs irrelevanti minn liema pajjiż tal-Unjoni Ewropea ġej,” sostna Westerberg.
Il-każ tal-Falcon Funds iddomina l-aħbarijiet fl-Iżvezja u għadu jiddomina sal-lum il-ġurnata. L-attenzjoni fuqu kibret minħabba l-preżenza ta’ eks ministru ta’ gvern fit-tmexxija tiegħu, tant li ġurnalista Żvediża ġiet f’pajjiżna tfittex u tistaqsi lil Tonio Fenech dwaru.
Tonio Fenech dejjem iddefenda l-pożizzjoni tiegħu. Meta kien żvelat il-każ għall-ewwel darba, Tonio Fenech kien qal li l-Iżvediżi għandhom aġenda quddiemhom li jħammġu r-reputazzjoni ta’ pajjiżna fil-qasam finanzjarju.
Però, il-każ kompla jiżviluppa sakemm l-aġenzija Żvediża ddeċidiet li ma jkollha x’taqsam xejn mal-fond ta’ Tonio Fenech. Iżda, Tonio Fenech baqa’ jinsisti li hu u d-diretturi tal-Falcon Funds imxew tajjeb mal-klijenti tagħhom.
“Iva għamilna kollox kif suppost,” kien wieġeb Tonio Fenech, anke jekk Falcon Funds tilfu kawża wara oħra. Għax Falcon Funds kienu marru l-Qorti Żvediza b’dan il-każ. Iżda tilfu saħansitra l-appell.
Iżda, issa li anke l-awtoritajiet Maltin ħadu passi spiċċa jgħid li jaqbel mal-pass tal-MFSA. Issa Falcon Funds marru l-Qorti ma’ ċertu Emil Ingmanson (karattru desritt bħala dubjuż li kien involut fil-fond) u Temple Asset Managment. Għalkemm meta faqqa’ l-każ, Tonio Fenech kien ikkwotat jiddubita l-akkużi li bdew iqumu fil-konfront ta’ Ingmanson, tant li kien qal li kienu biss rapporti f’gazzetti.
SAĦĦA MIL-LIĠI
L-azzjonijiet li ħadet l-MFSA huma riżultat ta’ artiklu fil-liġi li jagħti setgħat lill-awtorità kompetenti biex tħares lill-pubbliku. L-artiklu 15A fl-Att Dwar Servizzi ta’ Investiment.
15A.(1) Mingħajr preġudizzju għas-setgħat mogħtija lill-awtorità kompetenti taħt dan l-att, l-awtorità kompetenti tista’, meta tkun sodisfatta li jkun hemm ċirkostanzi biżżejjed, tgħaddi biex tieħu xi miżura waħda jew aktar minn dawn li ġejjin:
(a) taħtar persuna biex tagħti parir lid-detentur tal-liċenzja dwar kif imexxi sew l-attivitajiet tiegħu;
(b) taħtar persuna biex tmexxi l-assi tad-detentur tal-liċenza, jew xi parti minnhom, għall-finijiet li jitħarsu l-interessi ta’ investituri, konsumaturi, kredituri jew,jekk ikun hemm, azzjonisti, tad-detentur tal-liċenzja;
(ċ) taħtar persuna biex tieħu f’idejha l-kontroll tan-negozju tad-detentur tal-liċenza, jew biex tkompli għaddejja b’dak in-negozju jew biex twettaq kull funzjoni jew funzjonijiet oħra fir-rigward ta’ dak in-negozju, jew parti minnu, hekk kif tista’ tordna l-awtorità kompetenti;
(d) tistabbilixxi l-ħlas li għandu jitħallas lid-detentur tal-liċenzja għal kull persuna maħtura taħt l-artikolu 15 jew taħt dan l-artikolu;
(e) tagħmel kull ħaġ’oħra li tqis adatta fiċ-ċirkostanzi biex tagħti seħħ aħjar lill-implimentazzjoni tad-dispożizzjonijiet ta’ dan l-artikolu,u wara li tkun adottat xi miżura waħda jew aktar minn dawk imsemmija hawn qabel, l-awtorità kompetenti tista’ tibqa’għaddejja b’xi miżura waħda jew aktar, sew b’ żieda magħhom jew minflokhom.
