Il-festi jġibu magħhom sforzi kbar matul is-sena.
Sforzi li jilħqu l-aqwa tagħhom hekk kif tersaq il-ġimgħa tal-festa, fejn il-maġġoranza ta’ dan ix-xogħol isir minn diversi voluntiera f’diversi għaqdiet f’kull lokalità. Huwa b’hekk li l-impenn u d-dedikazzjoni ta’ dawn il-voluntiera f’diversi għaqdiet, bħall-każini tal-banda jiġu rikonoxxuti u mgħejjuna.
L-għaqdiet mużikali, fost il-ħafna għaqdiet volontarji jiffaċċjaw ħafna sfidi fosthom dawk finanzjarji u ta’ riżors uman, biex jaħdmu matul is-sena u biex iżommu ħaj il-wirt kulturali fl-ibliet u l-irħula.
Huwa għalhekk li fl-aħħar ħames snin, l-Aġenzija Servizzi Ewropej f’Malta (SEM) għenet lill-għaqdiet mużikali japplikaw b’suċċess għal madwar 25 proġett, fejn dawk li applikaw wettqu proġetti li bihom sebbħu u ġeddew il-każini tagħhom, imma wkoll xtraw tagħmir u strumenti li bihom saħħew it-tradizzjonijiet u l-ħiliet tal-bandisti u l-voluntiera tagħhom.
Inizjattiva oħra li l-istess Aġenzija qed twettaq dan is-sajf hija dik li qed isiru żjarat matul il-ġimgħa tal-festa lil dawk l-għaqdiet mużikali li fl-aħħar snin ibbenefikaw minn fondi Ewropej għal proġetti ta’ natura differenti fil-lokalitajiet tagħhom.
Dwar dan, tkellimna mall-Kap Eżekuttiv tal-Aġenzija Servizzi Ewropej f’Malta Rodrick Zerafa.
Qal, “Bħalissa qed nagħmlu kampanja ta’ informazzjoni bl-isem ta’ ‘Il-Festa bil-Fondi Ewropej’ fejn qiegħdin induru numru ta’ każini, Għaqdiet Mużikali, Soċjetajiet Mużikali, illi dawn ibbenifikaw mill-Fondi Ewropej, permezz tal-assistenza ta’ Servizzi Ewropej f’Malta, u għalhekk għamlu tibdiliet fi ħdan il-binja tagħhom, tibdiliet fejn tidħol ukoll il-banda tagħhom, u għalhekk qiegħdin inkomplu naraw kif permezz tal-fondi ewropej dawn l-istess għaqdiet ibbenifikaw.”
Il-fondi Ewropej għenu lill-każini tal-banda jirranġaw il-bini tagħhom sabiex ikun jistgħu jsaħħu l-operat tagħhom.
Iżda l-għajnuna tmur lil hinn mill-appoġġ għal proġetti infrastrutturali.
Fil-fatt, matul is-snin, SEM assistiet lil diversi każini tal-banda u għaqdiet volontarji bħall-Għaqda Każini tal-Banda, biex jiksbu fondi Ewropej għal proġetti mmirati sabiex ikabbru l-għarfien u l-kuxjenza dwar it-tradizzjonijiet tal-festa Maltija maż-żgħażagħ, fejn anke diversi mużiċisti żgħażagħ Maltin kellhom l-opportunità li jipparteċipaw fi skambji ma’ żgħażagħ barra minn Malta bl-għan li jkabbru l-għarfien u l-ħiliet mużikali tagħhom.
Fost dawk li bbenefikaw, hemm l-Għaqda Mużikali Beland taż-Żejtun, lill-Għaqda Banda Żejtun, l-Għaqda Mużikali San Ġorġ Martri ta’ Ħal Qormi, l-Għaqda Mużikali Sant Andrija ta’ Ħal Luqa, kif ukoll l-Għaqda Mużikali San Ġużepp ta’ Ħal Għaxaq.
Qal, “Inħeġġeġ lil dawk li qed isegwuna sabiex huma wkoll jekk huma interessati fil-fondi ewropej, huma ġejjin minn xi Għaqda Mużikali, jew inkella soċjeta’ tal-banda, ikellmuna għaliex aħna tista’ tgħid li aħna l-onestop shop fejn jidħol il-fondi ewropej, għalfejn? Onestop shop tal-fondi ewropej għaliex aħna nippromwovu l-fondi ewropej, però mbgħad ngħinuk timla l-applikazzjoni u jekk hemm bżonn ukoll, dan il-proġett jiġi aċċettat, naraw li fost l-oħrajn ngħinu fejn tidħol l-implimentazzjoni.”
Għal aktar informazzjoni dwar kif il-fondi Ewropej jappoġġjaw diversi inizjattivi tal-każini tal-banda, wieħed jista’ jikkuntattja lil SEM fuq sem.gov.mt jew permezz tal-email info.sem@gov.mt jew it-telephone 2779 7300.
