Matul is-sena l-oħra ġew ikkonfiskati izjed minn miljun ewro fi flus kontanti marbuta ma’ traffikar ta’ droga, b’din iċ-ċifra tkun l-ogħla waħda fl-aħħar għaxar snin u d-doppju tas-sena ta’ qabel.
Dan filwaqt li s-sena l-oħra l-Pulizija għamlu rekord fil-qabdiet tad-droga.
Żvela dan il-Ministru għall-Intern u s-Sigurtà Byron Camilleri waqt il-programm INSIGHTS fuq ix-xandir nazzjonali.
Camilleri qal, “Fl-2022 rekord mill-Pulizija fil-qabdiet tad-droga u l-flus ikkonfiskati mit-traffikar tad-droga Iżda mhux biss il-qabdiet ta’ droga kienu kbar, iżda wkoll il-prosekuzzjonijiet marbuta mad-droga u meta nitkellmu prosekuzzjonijiet mhux marbuta biss ma’ traffikar tad-droga iżda wkoll marbuta ma’ money laundering mid-droga. Ħareġ minn mistoqsiija parlamentari li llum qed tintuza il-follow the money approach li hu mod kif mhux biss taqbad id-droga iżda wkoll tweġġa’ l-kriminalità organizzata tweġġaha bl-aktar mod possibbli.”
Fl-istess programm, il-Ministru Camilleri għamel referenza għal tliet rapporti ippublikati fl-aħħar xhur; ir-rapport tal-Ewrobarometru mill-Kummissjoni Ewropea li jgħid li l-fiduċja tal-pubbliku fil-Korp tal-Pulizija żdiedet bi 15%, ir-rapport tal-Uffiċju Nazzjonali tal-Istatistika ppubblikat din il-ġimgħa li juri kif 90% tal-popolazzjoni għandha fiduċja fl-istess Korp u r-rapport tal-Professur Saviour Formosa li jgħid kif il-kriminalità f’pajjiżna naqset b’5.4% matul is-sena li għaddiet.
F’dan l-isfond, il-Ministru Camilleri qal li meta l-Oppożizzjoni tgħid li żdiedet il-kriminalità, anke jekk il-figuri juru mod ieħor, l-Oppożizzjoni Nazzjonalista tkun qed tattakka lill-Pulizija stess.
Hu stqarr, “Però meta tgħid hekk mhux lili jkunu qed iweġġgħu, mhux lili jkunu qed jippruvaw isawtu iżda tkun qed issawwat lil dawk il-Pulizija li bħal ma rajna fil-vidjo tal-Gżira, għamlu xogħlhom bl-akbar reqqa, l-aqwa dedikazzjoni u l-aktar mod professjonali kif imxew mal-każ fil-Gżira.”
Meta mistoqsi mill-preżentatur tal-programm, il-Ministru Camilleri qal kif l-investiment qawwi li sar fil-Korp tal-Pulizija fl-aħħar snin kien strumentali għal dawn is-suċċessi miksuba mill-istess Korp.
Apparti investiment fir-riżors uman, il-Ministru spjega kif sar ukoll investiment fl-għodda u t-tagħmir li l-uffiċjal juża’ fil-qadi ta’ dmirijietu.
Camilleri qal, “Għandek il-body cams li kienet waħda mill-iżjed affarijiet li bidlet il-mod kif joperaw il-Pulizija u naqsu l-allegazzjonijiet, kellek investimenti oħra tat-taħriġ bħas-simulators. Investimenti oħra marbutin mat-teknoloġija.”
Il-Ministru Byron Camilleri qal ukoll kif it-trasformazzjoni li għaddejja fil-Korp tal-Pulizija kienet teħtieġ ukoll bidla fil-mentalità.
Hu sostna, “Jien sibt sitwazzjoni fejn l-uffiċjal tal-Pulizija fl-għassa filgħodu jinvestiga serqa, f’nofsinhar jagħmel xogħol ieħor pulizjesk u filgħaxija jnaddaf l-għassa. B’kull rispett lejn min inaddaf u l-umiltà u nirrispetta ħafna lil dawn il-persuni però ma naħsibx li xogħol li għandu jagħmel il-Pulizija.”
Fl-istess programm, il-Ministru Byron Camilleri tkellem ukoll dwar is-sitwazzjoni tal-ħabs.
Sostna li matul is-sena li għaddiet saru l-akbar numru ta’ testijiet għad-droga fuq il-priġunieri, b’dawk pożittivi jkunu lanqas fl-aħħar snin. Qal li llum il-ħabs huwa post ta’ rijabilitazzjoni u mhux post mifni bi droga u l-vjolenza. Temm jgħid li għall-ewwel darba, infetħet ‘family room’ ’l barra mill-binja tal-ħabs f’Kordin, fejn il-priġunieri jkunu jistgħu jqattgħu ftit ħin ta’ kwalità mat-tfal tagħhom barra mill-ambjent tal-ħabs.
