Fl-2019 daħlu 329 cruiseliner fil-Port il-Kbir, filwaqt li sa Mejju tal-2022 daħlu 80

Fis-sena ta’ qabel l-imxija tal-Covid 19, daħlu tliet mija u ħamsa u tletin cruiseliner fil-Port il-Kbir ta’ pajjiżna.

Sal-aħħar ta’ Mejju ta’ din is-sena diġà daħlu 80 cruiseliner.

Dan ħareġ fi tweġiba Parlamentari mwieġba mill-Ministru għat-Trasport u l-Infrastruttura, Aaron Farrugia.

B’rabta ma’ dan il-qasam, iltqajna ma’ Stephen Xuereb li huwa l-Kap Eżekuttiv tal-Valletta Cruise Port u staqsejnih kif qed jirkupra s-settur tal-cruiseliners f’pajjiżna wara l-pandemija.

Qal li “din is-sena qed inħarsu lejn ‘il fuq minn tliet mitt call, issa sa Mejju kellna tmenin call. Qed inħarsu li din is-sena nilħqu bejn wieħed u ieħor erba’ mija u ħamsin elf u ħames mitt elf passiġġier, li jiġi nofs is-sena rekord li kellna fl-2019 qabel il-pandemija.”

Is-Sur Xuereb tkellem dwar l-investiment li sar f’dawn l-aħħar sentejn.

Saħaq kif “fl-aħħar sentejn ħadna l-opportunità li tajna wiċċ ġdid lill-Valletta Waterfront billi nvestejna tnejn punt tnejn miljuni biex għamilna l-outdoor canopies.”

Malta, il-bieb għall-Meditteran, huwa b’dan il-ħsieb li jitmexxa s-settur tal-cruiseliners f’pajjiżna.

Stephen Xuereb żied jgħidilna li l-Gvern, barra l-proġett tax-shore to ship fil-Port il-Kbir, bħalissa għaddej ukoll, b’investiment ta’ kważi 10 miljun ewro, biex il-moll ta’ Pinto 4 u 5 jiġi mwessa’ bi 15-il metru biex ikun jista’ jakkomoda cruiseliners ta’ ’l fuq minn 300 metru.

Is-Sur Xuereb qalilna li l-ġejjieni għal dan is-settur, huwa pożittiv.

Tenna li “l-prospetti jidhru tajbin, ovvjament kien bidu diffiċli fis-sens, li mhux il-vapuri ma daħlux, għax daħlu xorta. In-numru ta’ passiġġieri abbord ma kienx kif wieħed qed jistenna, inqas mill-kapaċità tas-soltu, però f’dal-aħħar ġimgħat jidher li qed terġa’ titla l-kapaċità abbord, ilħaqna diġà t-tmenin fil-mija, allura l-prospetti huma tajbin għall-kumplament tal-istaġun.”