F’jum il-Milied mhux mistennija xita iżda se jkun riħ qawwi.
Skont tbassir tat-temp, f’dawn il-jiem tal-Milied mistenni riħ iżda mhix mistennija xita u lanqas daqstant ksieĦ matul dawn il-jiem ta’ festi.
Bl-ogħla temperatura mistennija tkun 18°C, l-aktar temperatura baxxa mistennija tinżel għal 12°C.
Fil-fatt il-lejl tal-Milied mistenni jkun ikkaratterizzat minn riħ qawwi ta’ Forza 6, li se jkun qed jonfoħ mill-Majjistral. Ir-riħ mistenni jbatti għal Forza 5 sa jum il-Milied, u jdur mill-Grigal biex isir riħ ħafif sal-għada tal-Milied.
ONE News tkellem ma’ Patrick Zahra, Uffiċjal Metereoloġiku: “Ilu minn nhar it-Tnejn ir riħ jonfoħ sew. Fl-istrina mistenni jbatti xi ftit imma għalissa r-riħ mistenni jonfoħ sew.”
F’dan l-isbaħ żmien tas-sena x-xemx xitwija se tkun fl-aqwa tagħha.
Filwaqt li t-temp mistenni jkun imsaħħab fl-għodwa tal-Milied, is-sema mistennija tiċċara sa tmiem il-ġurnata. Zahra qalilna: “Temp xemxi. Daqxejn sħab imma temp tilħaq il-medja temp 18°C medja li nistgħu nilhqu.”
Għaldaqstant dawk kollha bil-vaganzi, żgur li t-temp mhux se jħassibhom sabiex jgawdu d-diversi attivitajiet li jsiru f’dawn il-festi.
