Il-gazzetta t-Torċa tefgħet dawl fuq filmat li sa qabel illum inżamm mistur dwar kummenti riċenti ta’ Roberta Metsola ftit ġimgħat qabel vot fil-Parlament Ewropew dwar l-abort.
F’dan il-filmat tkompli toħroġ l-ipokresija ta’ Metsola fejn barra minn Malta tgħid mod u f’pajjiżna tgħid mod ieħor dwar is-suġġett.
Il-filmat inkwistjoni juri lil Metsola fi Gdansk il-Polonja f’nofs Frar li għadda fejn ġiet mistoqsija minn żagħżugħa Pollakka dwar l-abort.
“Will you support our European citizens initiative my voice, my choice, so that the EU will do everything in its power to support access to save abortion? Thank you.”
Pronta kienet it-tweġiba ta’ Roberta Metsola għal mistoqsija ċara dwar vot din il-ġimgħa li ġej fi Brussell biex l-abort ikun dritt fundamentali.
Fi kliemha l-pożizzjoni tal-Parlament Ewropew, li diġà esprima ruħu favur l-abort, hi l-pożizzjoni tagħha.
“The European Parliament is extremely confident on this issue and as I said I was elected and my colleagues will be testament to that, that the European Parliament position it is my position.”
Inċidentalment ftit jiem wara li qalet pożizzjoni favur l-abort għax kienet barra minn Malta quddiem udjenza favur, fuq il-midja tal-Knisja f’intervista ma’ Andrew Azzopardi, qalet il-kontra.
“Il-vot tiegħi huwa ċar. Dejjem kien ċar. Mhux bħal ħaddieħor, bidel u għamel. Iġifieri int dejjem ivvotajt kontra. Għax dak huwa dmir tiegħi u dak huwa li nemmen fih.”
Anki qabel dan il-filmat u d-dikjarazzjonijiet tagħha fil-Polonja, kienet esprimiet pożizzjoni differenti.
“On this issue the position of the parliament is unambigous and unequicoval and that is also my position.”
Il-gazzetta t-Torċa nnutat kif Metsola qed iddur żugraga fejn skont fejn tkun, Metsola tibdel il-pożizzjoni u tkun ipokrita.
L-ipokresija ta’ Metsola nnutawha bosta osservaturi politiċi u analisti għal mod kif quddiem udjenza barranija tgħid mod imbagħad għal għajnejn u l-widnejn lokali, qed tgħid il-kontra.
Fl-aħħar jiem, Raphael Vassallo fuq il-Maltatoday innota f’artiklu bit-titlu ‘Metsola’s abortion miracle’, li ma’ Metsola ma tafx fejn int għax qed tgħid żewġ pożizzjonijiet differenti fl-istess ħin u quddiem udjenzi differenti.
Vassallo rrimarka għall-fatt li Metsola ffirmat il-Patt tas-Simone Veil imbuttat mill-President Franċiż Emmanuel Macron.
Fi kliem ieħor Metsola iffirmat favur l-abort iżda mbagħad lil Maltin tgħidilhom li hi kontra.
Raphael Vassallo saħaq fl-artiklu li oħroġ il-għaġeb quddiem dikjarazzjonijiet li Metsola ħadet il-pożizzjoni favur l-abort, il-forzi kontra l-abort f’pajjiżna ma tkellmux.
Qal li jew seħħ miraklu u dawn il-forzi ġralhom bħal San Pawl fil-konverżjoni ta’ Damasku meta waqa’ minn fuq iż-żiemel u ra d-dawl jew inkella meta nixfet il-linka li biha Metsola ffirmat Patt favur l-abort, imbagħad dawk kontra l-abort bdew jitkellmu fuq id-demm tat-trabi mhux imwielda.
