Artist ewlieni ta’ Bollywood jinsab f’Malta għall-ġbid ta’ film Indjan. Madwar ħamest ijiem ilu, Salman Khan tella’ ritratt tiegħu f’Malta fejn qal kif bdew jinġibdu l-ewwel xeni f’Malta għall-film Indjan, Bharat. Dan wara li ntemmet l-ewwel skeda f’Mumbaj.
Dan hu film li se jerġa’ jittella’ mill-ġdid iżda bi produzzjoni Indjana wara li sar għall-ewwel darba minn produzzjoni mill-Korea t’Isfel bil-film kien jismu Ode to My Father.
Il-film se jkollu artisti magħrufa sew fix-xena tal-films Indjani, fosthom l-artist ewlieni Salman Khan li mal-wasla tiegħu f’Malta ħamest ijiem ilu, faħħar is-sbuħija ta’ dawn il-gżejjer. Khan saħansitra qasam mument tiegħu jdur f’San Ġiljan id f’id ma’ “l-imħabba ta’ ħajti”, li hi ommu.
Huma eluf ta’ persuni li kkummentawlu fejn qalulu kif hi xi ħaġa ta’ meravilja li hu jista’ jdur waħdu mingħajr ħadd ma jdejqu. Huma bosta siti barranin, b’mod partikolari Indjani, li qasmu l-aħbar li Salman jinsab Malta proprju għall-film Bharat.
