B’ħidma bejn missier u iben, nibet film ta’ livell internazzjonali bl-isem The Boat li se jintwera għall-ewwel darba fis-swali taċ-ċinema fit-22 ta’ Frar.
Il-film, li hu 90 minuta twil, jitratta sajjied li joħroġ bid-dgħajsa fuq il-baħar, bil-jum ilaqqgħu ma’ destin differenti minn dak mistenni.
Id-Direttur tal-film, Winston Azzopardi spjegalna kif dan is-sajjied jinqabad fiċ-ċpar u jispiċċa jaħbat ma’ dgħajsa oħra. Hu jitla’ abbord iżda xħin jerġa’ joħroġ isib li d-dgħajsa tiegħu għosfrot, bil-konsegwenza li jispiċċa maqbud fuq dgħajsa li mhix tiegħu.
Is-Sur Azzopardi spjegalna kif il-film żviluppah flimkien ma’ ibnu, Joe Azzopardi, li huwa wkoll il-protagonist u l-uniku attur f’dan il-film.
Huwa qal: “Ktibna l-iscript flimkien żviluppajnieh flimkien u noqgħod ħafna fuq dak li beda jgħidli joe għax ovvjament ideat taż-żgħar u mhux ideat tiegħi. Kellna dik it-taħlita ta’ bejn xi ħadd li jara l-affarijiet klassiċi għal affarijiet moderni ta’ kif jarahom hu.”
Il-film ġie ffilmjat fuq il-baħar u fit-tankijiet tar-Rinella u fit-tim kien hemm madwar 60 persuna li kollha kienu Maltin ħlief tnejn.
Dan flimkien ma’ sebgħin persuna oħra li f’Londra ħadu ħsieb ix-xogħol fuq il-film wara li ttieħdu l-filmati.
Spjega kif l-idea għall-film ġiet wara li kienu ħadmu fuq film ieħor ta’ madwar tnejn u għoxrin minuta li ħaduh għal għadd ta’ festivals barra minn Malta u li rebaħ bosta premji.
Intant The Boat hu nnominat għal tliet premji fin-National Film Awards tal-2019 tar-Renju Unit, fosthom Joe Azzopardi għall-Aqwa Attur, nominazzjoni għal The Boat bħala l-Aqwa Xeneġġjatura u nominazzjoni oħra għal Winston Azzopardi bħala l-Aqwa Direttur.
Fin-nominazzjonijiet insibu wkoll Diretturi magħrufa fosthom Idris Elba, Steve McQueen u Alex Garfield.
Mas-Sur Azzopardi tkellimna wkoll dwar l-esperjenzi tiegħu fid-dinja tal-films fejn qalilna li ilu f’dan ix-xogħol kważi ħajtu kollha u spjega kif The Boat irċieva kummenti pożittivi ħafna speċjalment fl-Istati Uniti.
The Boat se jintwera għall-ewwel darba f’pajjiżna fit-22 ta’ Frar fl-Eden Cinema fejn wara l-film se jkun hemm il-missier u l-iben, id-direttur u l-attur, jirrispondu għall-mistoqsijiet ta’ dawk preżenti.
Is-Sur Azzopardi spjegalna aktar dwar din it-tnedija.
Huwa qal: “Il-film se joħroġ madwar id-dinja f’20 pajjiż. L-ewwel se jkun qed joħroġ l-Amerika, imbagħad ftit wara se joħroġ fil-pajjiżi l-oħrajn fosthom iċ-Ċina, l-Ġermanja. Billi hu film Malti, Malta se nkunu qed narawh qabel dan għax dehrli li l-ewwel għandhom jarawh il-Maltin”.
