Meta qegħdin fuq l-għatba ta’ nofs ix-xahar, il-15 t’Awwissu, ONE News sebaħ fl-għelieqi fejn jinħadem ix-xogħol tan-nar, marbut mal-festa ta’ l-Assunta fil-Qrendi.
Stajna naraw kemm il-ħidma piroteknika tirrikjedji sagrifiċċji, dedikazzjoni u mpenn, u fuq kollox kemm dawk li jaħdmu n-nar iqattgħu jiem ‘il bogħod mill-qraba tagħhom. Dan sabiex ipaxxu lil dawk kollha li għandhom għal qalbhom il-logħob tan-nar f’pajjiżna.
Din is-sena l-Għaqda tan-nar fi ħdan is-Soċjeta Mużikali Santa Marija tal-Qrendi qed tfakkar il-50 sena minn meta ħarġu l-ewwel murtali mill-Kamra tan-Nar Attwali f’tal-Muddejn fl-inħawi ta’ Ħas-Sejjieq.
Fl-għelieqi stajna ninnuttaw il-ħidma li tkun għaddejja, f’xemx taqli l-ankri. Jiddomina kollox arblu li din is-sena mistenni li jikser rekord.
Tkellimna ma’ Mario Zerafa li spjegalna fid-dettall dak li jkun qed isseħħ matul is-sena kollha b’rabta mal-festa, imma li jilħqu l-qofol tagħhom l-aktar fil-ġranet tal-festa. Qalilna kif l-ewwel isir ix-xogħol ta’ tħaffir għall-kanni u mbagħad isir dak kollu meħtieġ biex ikun hemm spettaklu tan-nar mill-aqwa u ħarqa tajba.
Din is-sena bħas-snin li għaddew barra l-ispettaklu ‘The Conquest of Darkness’ li jsir lejliet il-Festa tal-Assunta, Zerafa kellimna wkoll dwar l-istenijja fil-bypass tal-Qrendi u x-xogħol tan-nar tradizzjonali.
“Dawn l-aħħar tliet ijiem tal-festa imissna llejla fid-9.30pm bil-ħarqa ta’ murtali tradizzjonali u wara nitilgħu il-pjazza għax għandna nar sinkroniżżat minn fuq iI-bejt tal-Palazz Santa Marija fl-okkażjoni tat-tletin sena Sezzjoni Żgħażagħ. Għada jkollna l-iSpettaklu The Conquest of Darkness maqsum fuq 5 partijiet, biċċtejn nar sinkroniżżat mużikali bejnithom murtali tradizzjonali u nar tal-art u fl-aħħar għandna t-tapit sinkroniżżat mal-mużika u li fih se nipprovaw niksru r-rekord tal-itwal arblu bin-nar imwaħħal miegħu.”
