Il-grupp taż-żgħażagħ Franġiskani GIFRA qed jaħdmu biex nhar l-Erbgħa 13 ta’ April itellgħu Musical bl-Isem: “INT FEJN SEJJER?”. Din il-musical hija l-ħajja ta’ San Franġsik ta’ Assisi u dawn iż-żgħażagħ ħadmu għax irridu jwasslu messaġġ f’dan iż-żmien tar-Randan. Messaġġ li żgur is-soċjetà għandha bżonn tisma’, messaġġ li Franġisku ried iwasslu lin-nies ta’ żmienu, messaġġ li Franġisku waslu għax kien imwaħħad ma’ Kristu, ma’ Kristu li mmarkah bil-marki tal-passjoni. Dik il-passjoni li se niċċelebraw ftit tal-jiem oħra.
Dan il-Musical qed jitella’ fl-okkażżjoni li l-Ordni Franġiskan f’dawn is-snin qed jiċċelebra 800 sena mir-regola u minn meta San Franġsik irċieva l-Pjaġi Mqaddsa. Għalhekk dawn iż-żgħażagħ qed jistiednu lil kulħadd sabiex jingħaqad magħhom għal messaġġ li dejjem jibqa’ attwali u jistaqsu mistoqsija waħda: INT FEJN SEJJER?
Dan il-musical dwar il-Ħajja ta’ San Franġisk b’kitba ta’ P. Ġwann Abela OFM u direzzjoni ta’ Joe Quattromani se jittella’ nhar l-Erbgħa 13 ta’ April fis-7.30pm fil-Knisja ta’ San Franġisk, Triq il-Franġiskani, Ħamrun.
