Mill-1 t’April, fil-Belġju daħlet fis-seħħ liġi ġdida li tipprojbixxi li sigaretti jew kwalunkwe prodott tat-tabakk ikunu espositi fil-ħwienet.
Barra minn hekk, issa huwa wkoll ipprojbit il-bejgħ ta’ sigaretti minn supermarkets u ħwienet oħra li huma akbar minn 400m kwadru.
Dawn il-miżuri huma maħsuba biex jillimitaw il-viżibbiltà tas-sigaretti u prodotti oħra li joħolqu dipendenza, bit-tama li jitrażżan ix-xiri impulsiv, u flimkien jiffurmaw parti minn pjan biex jiġi eliminat għal kollox l-użu tat-tabakk.
Taħt is-superviżjoni tal-Ministru tas-Saħħa Belġjan Frank Vandenbroucke, l-ewwel parti ta’ din il-miżura kienet introdotta fl-1 ta’ Jannar li għadda bi projbizzjoni fuq sigaretti elettroniċi disposable.
Madankollu x-xiri u l-bejgħ tas-sigaretti u prodotti tat-tabakk xorta jista’ jsir minn dawn il-ħwienet basta ma jkunux viżibbli u l-klijent jistaqsi speċifikament għalihom.
Il-fażi li jmiss tal-pjan, dik li ma jistax isir aktar tipjip f’terrazzi pubbliċi għadha trid tiġi approvata mill-leġislaturi Belġjani.
