Gaetano Campailla ta’ 52 sena minn Siracusa tressaq il-Qorti b’konnessjoni mal-10 kili droga kannabis li instabet f’karozza li waslet Malta bil-katamaran mill-Port ta’ Pozzallo fis-Sqallija.
L-isqalli ġie akkuzzat b’pussess u b’importazzjoni tal-Kannabis.
Is-sejba tad-droga saret l-Erbgħa permezz tal-kelb tad-Dwana Sparky, kelb beda jdur mal-karozza tal-isqalli.
Iżda l-ewwel tfittxijiet ma taw l-ebda riżultati. Madankollu l-kelb ma qatax qalbu u baqa’ jiġbed l-attenzjoni tas-sid tiegħu.
Kien għalhekk li qam is-suspett li d-droga setgħet kienet moħbija fil-kompartamenti tal-karozza. Għal din ir-raġuni, il-karozza ttieħdet fil-garaxx tal-Pulizija fejn l-esperti tal-Pulizija żarmaw diversi partijiet tal-karozza u ħarġu d-droga li kienet moħbija f’żewġ bibien.
B’fibre optic camera instabet li d-droga kienet moħbija fil-bibien.
L-ispettur Mark Mercieca qal li l-valur tad-droga kannabis kienet tammontaw għal għoxrin elf ewro.
L-isqalli wieġeb mhux ħati u inzamm arrestat.
