Fi tmiem din il-ġimgħa, kważi 50,000 anzjan se jingħataw ħlas ta’ benefiċċji li bejniethom se jammontaw għal aktar minn €19-il miljun.
Dan tħabbar f’konferenza tal-aħbarijiet mill-Ministru għall-Politika Soċjali u d-Drittijiet tat-Tfal, Michael Falzon, li qal li, mill-2012 ’l hawn tħallsu €142 miljun f’benefiċċji lill-anzjani.
Is-Segretarju Permanenti fi ħdan il-Ministeru, Mark Musù, spjega li l-ewwel ħlas huwa dak ta’ bonus lil persuni li ma jikkwalifikawx għall-pensjoni kontributorja, bl-għotja din is-sena titla’ għal €50 aktar mis-sena li għaddiet għal kull persuna.
Se jingħataw €450 għal dawk li ħallsu kontribuzzjonijiet bejn sena u erba’ snin, waqt li dawk li ħallsu bejn ħames u disa’ snin se jingħataw €550.
Is-Segretarju Permanenti Musù qal li din hija l-ħames żieda f’dan il-bonus kemm ilu jingħata mill-2015. B’kollox se jirċievu din l-għotja 12,263 persuna. Il-maġġoranza l-kbira ta’ dawk li se jieħdu dan il-bonus huma nisa: kważi 94%.
It-tieni ħlas huwa dak imsejjaħ Għotja għal Ċittadini Anzjani. Dan il-ħlas jingħata lil dawk l-anzjani li għandhom 75 sena jew aktar u li għadhom attivi fis-soċjetà u anki dawk l-anzjani li jħallsu minn buthom biex jgħixu.
Hawnhekk ġie spjegat li dawk l-anzjani li għandhom bejn il-75 u d-79 sena se jirċievu €300 fis-sena, waqt li dawk li għandhom 80 sena jew aktar se jitħallsu €400 fis-sena.
Is-Segretarju Permanenti Musù spjega wkoll li dawk l-anzjani li se jagħlqu l-75 sena din is-sena se jingħataw il-ħlas pro-rata u mis-sena d-dieħla d-dieħla jieħdu l-għotja b’mod sħiħ.
Il-pagamenti fi tmiem il-ġimgħa se jsiru lill-aktar minn 37,209 persuna, li l-maġġoranza tagħhom huma nisa.
Mill-2015 sa issa, mill-kontribuzzjoni tal-ħlas ta’ bonus lill-anzjani tħallsu kważi €33 miljun, waqt li mill-2012 s’issa mill-benefiċċju ta’ Ħlas ta’ Għotja għal Ċittadini Anzjani €109 miljun.
“Meta wieħed iħares ukoll lejn dawn l-aħħar snin, f’dik li hija l-għotja tal-anzjani, proprju huma dawk li għandhom aktar minn 75 sena mill-2012 ’l hawn, issa l-ispiża telgħet għal €110 miljun, kważi; filwaqt li dak li huwa l-bonus tal-kontribuzzjonijiet mill-2015 ’l hawn, minn mindu beda jingħata, l-ispiża totali se tkun telgħet għal kważi €33 miljun – jiġifieri b’kollox aktar minn €142 miljun.”
Is-Segretarju Permanenti fil-Ministeru, Mark Musù
Min-naħa tiegħu, il-Ministru għall-Politika Soċjali Michael Falzon qal li dawn il-ħlasijiet huma xhieda ta’ kemm dan il-Gvern għandu għal qalbu l-anzjani.
Hawnhekk, il-Ministru Falzon semma kif Gvern Laburista żied il-pensjonijiet għal seba’ darbiet sena wara sena.
Il-Ministru nnota li, minkejja l-isfidi li dan il-Gvern qiegħed isib quddiemu, xorta waħda żamm kelmtu u żied il-pensjonijiet.
“Għandek il-benefiċċju li introduċejna aħna bħala gvern Laburista fl-2015 għal dawk li m’għandhomx biżżejjed bolli biex jirċievu pensjoni kontributorja. Hemmhekk, qed nitkellmu madwar 12,000 persuna. Imbagħad għandna wkoll li jibqgħu jgħixu fil-komunità u jkollhom aktar minn 75 jew ikollhom aktar minn 80 sena. Il-bonuses, qed nitkellmu f’dan il-weekend biss, għandek madwar €19-il miljun: prova oħra ta’ kemm, bħala Gvern, għandna għal qalbna lill-pensjonanti; prova oħra ta’ kemm għandna fiduċja f’pajjiżna.”
Il-Ministru għall-Politika Soċjali, Michael Falzon
