Nhar il-Ħadd f’Gaza instab qabar li fih kien hemm ħmistax-il ħaddiem umanitarju li kienu ġew irrappurtati nieqsa ġimgħa qabel waqt li kienu fuq missjoni ta’ salvataġġ.
Fis-sigħat bikrin tat-23 ta’ Marzu, ambulanza tal-Palestine Red Crescent Society (PRCS) kienet fuq missjoni ta’ salvataġġ meta talbet għall-għajnuna hekk kif sfat attakkata mill-forzi Iżraeljani.
Konsegwentament tliet ambulanzi oħra kienu mibgħuta biex jassistuhom flimkien ma’ ekwipaġġ mill-organizzazzjoni tas-settur pubbliku Civil Defence iżda ftit wara intilef il-kuntatt magħhom.
Il-Forzi tad-Difiża Iżraeljana qalu li t-truppi kienu sparaw fuq l-ambulanzi għax ma kienux ikkordinaw il-movimenti tagħhom mal-militar u li ma kellhomx id-dwal u s-sinjali ta’ emerġenza fuq il-vetturi mixgħula. Iżda d-direttur tas-Servizzi tal-Emerġenza u Ambulanzi, Mohammed Abu Mosahba qal li din il-kordinazzjoni ma kinitx meħtieġa għax ma kienux qed joperaw minn żona ta’ evakwazzjoni filwaqt li kkontesta li l-vetturi ma kellhomx dwal mixgħula hekk kif sostna li l-vetturi tagħhom kienu kjarament indikati u mmarkati bħala vetturi ta’ emerġenza.
Ironikament, madwar 4 sigħat wara li seħħ l-attakk, din iż-żona kienet iddikjarata bħala waħda ta’ evakwazzjoni.
Mirduma parzjalment fejn instabu l-iġsma, kien hemm l-erba’ ambulanzi, fire engine u vettura tal-Ġnus Magħquda. Filwaqt li l-iġsma kienu viżibilment maħruqa jidher li l-vetturi kienu ġew mgħaffġa.
Mistoqsija dwar dan, l-IDF qalu li kienu qed jinvestigaw il-każ.
L-iskoperta ta’ dan il-qabar tal-massa jkompli jqanqal mistoqsijiet dwar is-sigurtà tal-organizzazzjonijiet li qed joffru għajnuna umanitarja f’Gaza hekk kif ukoll kienu rrappurtati żieda ta’ attakki fuqhom fl-aħħar ġimgħat. Qabel is-sejba ta’ dawn il-vittmi, mill-anqas 29 ħaddiem ta’ salvataġġ ieħor kienu rrappurtati maqtula jew midruba fil-ħmistax ta’ qabel li tagħmilha l-ogħla rata f’sena.
Minn meta bdiet il-gwerra fil-Gaza, qed ikun stmat li nqatlu mill-anqas 336 ħaddiem umanitarju.
