11:08am – F’Ħal Tarxien iltqajna ma’ folla enerġetika biex tibda l-Fun Run. Kienu bosta li jakkumpanjawhom kellhom l-akbar ħabib tal-bniedem fuq erba’ saqajn biex anki huma jagħtu s-sehem tagħhom għal din l-attività. Fosthom ukoll kien hemm diversi għaqdiet tar-raħal li kollettivament iltaqgħu biex jgħinu fil-ġabra b’risq il-Fondazzjoni Malta Community Chest Fund.
10:42am – Fil-Pjazza taż-Żejtun folla numeruża tat il-bidu għall-Fun Run b’risq il-Fondazzjoni Malta Community Chest Fund. Aktar minn mitejn persuna qegħdin jagħtu sehemhom fiż-Żejtun biss u filwaqt li jagħmlu l-eżerċizzju, qegħdin ukoll jagħtu daqqa t’id għal għan nobbli.
Fosthom u qalb din il-folla kien hawn l-ogħla karigi tal-pajjiż. Preżenti kien hemm il-President ta’ Malta George Vella u martu Miriam.
Il-President Vella esprima s-sodisfazzjon tiegħu għar-ritorn ta’ dan l-avveniment li huwa prova ċara ta’ għaqda u solidarjetà nazzjonali. Huwa rringrazzja lil dawk kollha li b’xi mod middu jdejhom biex itellgħu l-fun run li din is-sena qed isseħħ madwar il-lokalitajiet Maltin u Għawdxin.
Intant, il-Prim Ministru ta’ Malta Robert Abela, imdawwar biż-Żwieten, għamel referenza għall-importanza tas-solidarjetà u l-empatija. Huwa tkellem ukoll dwar il-vaċċin u kif dan għen sabiex tkun tista tittella’ din l-attività b’suċċess. Huwa ħeġġeġ lill-poplu Malti biex jitlaqqam bid-doża tal-booster. Jakkumpanjawh kienu Dr Lydia Abela u binthom Giorgia Mae.
Preżenti kien hemm ukoll il-Kap tal-Oppożizzjoni Bernard Grech u l-Arċisqof Charles Scicluna.
Aktar qabel – Jingħata bidu għat-tnax-il edizzjoni tal-President’s Solidarity Fun Run, b’risq il-Malta Community Chest Fund.
Dan wara nuqqas ta’ sena, hekk kif is-sena l-oħra din il-mixja ma saritx minħabba l-imxija tal-Covid-19.
Minkejja r-ritorn tagħha, din is-sena l-Fun Run ser tkun qed isir b’mod differenti. Dan hekk kif din is-sena se jkunu qed isiru madwar 68 mixja differenti f’diversi lokalitajiet madwar il-gżejjer Maltin.
Il-President ta’ Malta George Vella u l-Prim Ministru Robert Abela, flimkien mas-Sinjura Vella u s-Sinjura Lydia Abela, ser jkunu qegħdin jagħmlu din il-mixja fil-lokalità taż-Żejtun, filwaqt il-mixja se tiġi fi tmiemha f’Sant’Anton fejn hemmhekk mistenni jkun hemm bosta Sindki ta’ lokalitajiet differenti minn madwar Malta.
Ara wkoll:
