In-negozjant Yorgen Fenech wieġeb bosta drabi li ma jiftakarx, meta mistoqsi jwieġeb dwar allegazzjonijiet li għamel fil-konfront tal-kap tal-Iskwadra tal-Omiċidji l-Ispettur Keith Arnaud.
Fenech qed jallega li Arnaud kien qed jgħaddi informazzjoni lil Keith Schembri u li talbu pjaċir.
Fenech qed jinżamm arrestat fil-faċilità korrettiva ta’ Kordin hekk kif huwa s-suspettat mandat fil-qtil ta’ Daphne Caruana Galizia.
Quddiem l-Imħallef Lawrence Mintoff f’każ li fetaħ kontra l-Ispettur Arnaud, Fenech qal li Schembri kien jgħidlu li l-informazzjoni dwar il-qtil ta’ Caruana Galizia kien jagħtihielu l-Ispettur Arnaud.
Iżda Fenech ma eskludiex li din l-informazzjoni Schembri kien iġibha minn briefings li kien ikun hemm Kastilja.
Fenech qal li huwa kien qed ikollu informazzjoni kontinwa dwar l-investigazzjonijiet tal-pulizija.
Qal li kien jaf dwar l-arrest tal-eżekuturi fl-2017 u li Vince Muscat, il-Koħħu, u l-Avukat tiegħu Arthur Azzopardi kienu qegħdin jitkellmu mal-Pulizija.
Yorgen Fenech qal li fil-bidu ta’ din is-sena Schembri qallu li l-pulizija qed isegwi mill-viċin lil Theuma minħabba kazijiet relatati mal-finanzi tiegħu. Allega wkoll li kien qallu li kellu jsir raid fuq Theuma dwar affarijiet relatati ma’ flus.
Fenech qal li qatt ma ltaqa’ ma’ Arnaud u li Schembri kien jgħidlu li għandu relazzjoni mill-qrib mal-Ispettur.
Qal li ġieli kien ikun ma’ Schembri u dan kien jgħidlu li bagħatlu Arnaud, iżda qal li ma jafx x’kien l-kontenut tal-messaġġi.
Dwar l-allegazzjoni li Schembri sab impjieg lill-mara tal-Ispettur Arnaud, Fenech qal li ma jiftakarx il-kliem eżatt li qallu Schembri.
Fi stqarrija, Infrastruttura Malta kienet iddikjara li l-mara tal-ispettur ingħatat impjieg wara proċess u għażla pubblika.
