- L-ISPIŻA LI JITKELLEM KONTRA TAGĦHA BUSUTTIL HI FL-EDUKAZZJONI, IS-SAĦĦA U S-SETTUR S-SOĊJALI
• ANALIŻI TEKNIKA – PROVA LI MILL-ĠID GAWDA KULĦADD
Analiżi teknika turi li l-ispiża rikorrenti, li l-Kap tal-Oppożizzjoni tant jitkellem dwarha, żdiedet fl-iktar oqsma importanti fil-ħajja tan-nies.
Meta mqabbel mal-2012 iż-żidiet f’oqsma importanti s-sena li għaddiet kienu fenomenali. Dan minbarra l-bidu ta’ servizzi ġodda. Fost dawn insibu l-qasam tas-saħħa fejn kien hemm żidiet sostanzjali f’oqsma bħax-xiri tal-mediċini u l-pagi kif turi t-tabella li qed nippubblikaw.
Imbagħad daħlu servizzi ġodda li fi żmien Gvern Nazzjonalista ma kinux jeżistu. Fosthom dawk marbuta mal-IVF li permezz tagħhom familji ngħataw ħajja ġdida. Servizzi oħra huma marbuta mal-kanċer fejn mhux biss qed tingħata mediċina ġdida, iżda qed jinxtara apparat li jagħmilha possibbli biex kura li qabel kienet tingħata barra l-pajjiż jew saħansitra ma kinitx disponibbli issa tingħata f’Malta.
B’hekk jekk biex tinżel l-ispiża rikorrenti tonqos l-ispiża fuq is-saħħa, l-impatt jinħass direttament fuq il-familji.
Bħalma jinħass jekk Simon Busuttil jitħalla jreġġa’ l-arloġġ lura fil-qasam tal-edukazzjoni għax uħud mill-proposti ewlenin li kienu attwati Simon Busuttil kien tkellem kontra tagħhom. Fost dawn hemm il-garanzija għaż-żgħażagħ u l-istipendju għal min jirrepeti. Il-garanzija għaż-żgħażagħ kien sejħilha l-garanzija tal-washing machine. Minkejja li kien jaf li kienet maħsuba biex ma jintilfux mis-sistema edukattiva u mid-dinja tax-xogħol żgħażagħ, jew aħjar adolexxenti, li fid-dinja akkademika ma jkunux qed jirnexxu.
L-istipendu għal min jirrepeti wkoll kien qal li hu kontra tiegħu. Fost oħrajn f’artiklu ta’ opinjoni fit-Times of Malta, Simon Busuttil kien semma dawn il-proposti fost dawk li kellhom iwasslu għal bailout. Naturalment, magħhom kien hemm oħrajn bħall-ħlas lura tat-taxxa mħallsa żejda fuq il-karozzi.
Bl-argumentazzjoni tiegħu, Simon Busuttil jimmina wkoll iċ-child care b’xejn għax fuqha qed jintefqu 12–il miljun ewro fis-sena. Bdiet ukoll nefqa fuq programmi li jgħinu lill-ġenituri jibbilanċjaw l-impenji tax-xogħol mal-ħajja tal-familja, fuq quddiem nett il-Breakfast Club. Club li jagħti kolazzjon bnin lit-tfal li jkunu twasslu l-iskola siegħa qabel.
Fid-dawl li la jitkellem kontra l-ispiża rikorrenti li żdiedet minn xi mkien trid inaqqasha, hemm iktar x’nistaqsu dwaru. Il-mistoqsija li ssegwi hi jekk hux se tintlaqat l-ispiża fuq l-iskejjel tal-Knisja li żdiedet bil-miljuni tal-ewro bħalma żdiedet dik fuq il-Kulleġġ Malti għax-Xjenza u t-Teknoloġija u l-Università ta’ Malta.
In-nefqa soċjali
Għal Simon Busuttil u sħabu ż-żidiet huma kollha flus fil-ħela u attentati biex jinxtraw il-voti. Hekk tkellem wara kull baġit ippreżentat mill-Gvern ta’ Joseph Muscat. Hekk jgħid kull nhar ta’ Ħadd fil-laqgħat politiċi tiegħu.
Iżda, Simon Busuttil kien parti minn Gvern li ħalla l-ammont ta’ nies f’riskju ta’ faqar u esklużjoni soċjali jiżdied bi 18,000 persuna. Għax għalih l-investiment fin-nies huwa nefqa żejda.
Dan meta kien wiegħed lill-Unjoni Ewropea li se jnaqqsu b’6,560. Aktar inkwetanti kien li taħt il-gvern preċedenti, in-numru ta’ persuni f’faqar assolut kien tela’ minn 17,000 għal 37,000, b’aktar minn nofs iż-żieda fl-aħħar sena ta’ dik il-leġiżlatura – proprju meta Busuttil kien Viċi Kap tal-partit fil-Gvern.
Biex ma jżidx l-ispiża rikorrenti, Gvern Nazzjonalista kien ukoll iddeċieda li ma jagħti l-ebda żieda aktar miż-żieda tal-għoli tal-ħajja lill-pensjonanti u fiż-żewġ manifesti elettorali li kiteb qatt ma wiegħed żieda fil-pensjoni minima. B’hekk meta wieħed jisimgħu jitkellem kontra ż-żieda fin-nefqa rikorrenti, il-mistoqsija hi jekk hux se jerġa’ jagħmel l-istess jew inkella saħansitra jmurx lura fuq ċerti żidiet li ngħataw.
Hemm miżuri oħra li jistgħu jisfaw fil-mira ladarba jitkellem kontra n-nefqa rikorrenti u jgħid li mhix sostenibbli, minkejja li waqt li żdiedet pajjiżna rreġistra l-ewwel surplus f’35 sena.
Iżda, x’jagħmel? Ineħħi t-tapering tal-beneficcji soċjali lil dawk li jidħlu jaħdmu, fosthom lis-single parents? Ineħħi wkoll l-inwork benefit għax minħabba li huwa spiża rikorrenti Busuttil jemmen li dan huwa ħela u attentat biex jinxtraw il-voti?
Fil-baġit li għadda l-Gvern ħabbar riforma enormi fil-qasam tal-persuni b’diżabbiltà, fejn dawk li ma jistgħux jaħdmu se jaraw il-benefiċċju tagħhom jitla’ għall-valur tal-paga minima.
Dan il-Gvern fil-baġit li għadda wettaq riforma oħra enormi. Permezz tagħha l-carers ser ikollhom il-benefiċċju tagħhom jitla’ għal €140 fil-ġimgha, jew żieda ta’ €1,820 fis-sena.
Żdiedet ukoll b’madwar €728 fis-sena l-carer’s allowance li hija benefiċċju li jingħata lill-carers ta’ persuni li għandhom livell anqas ta’ dipendenza. Permezz ta’ dawn ir-riformi l-kontribut qawwi tal-carers ġie mogħti r-rispett xieraq.
Issa jekk għal Busuttil u sħabu dawn iż-żidiet fl-ispiża rikorrenti huma kollha ħżiena u frott attentat biex jinxtraw il-voti, x’se jagħmel?
Konklużjoni waħda hemm. Busuttil ireġġa’ lura l-ispiża fuq djar tal-anzjani u jħalli l-waiting lists jikbru b’rata allarmanti. Busuttil ineħħi l-appoġġ għal dawk li jagħżlu li joqogħdu fid-dar tagħhom.
Lill-carers u lill-persuni b’diżabbiltà Busuttil ineħħilhom iż-żidiet li ngħataw fl-aħħar baġit?
Wieħed ma joħodhiex bi kbira għax fil-fatt diġà vvota kontra dawn il-proposti kollha meta dan il-baġit tressaq fil-Parlament. Anke jekk kien jaf li dawn huma proposti li qed ikunu attwati mill-pajjiż li kellu l-ikbar tkabbir ekonomiku fl-Ewropa u għalhekk kien jiflaħ għalihom b’mod tajjeb ħafna. Kif fil-fatt irriżulta għax filwaqt li saru dawn in-nefqiet kollha, pajjiżna elimina għalkollox il-kelma defiċit.
