F’dar fil-Mellieħa sibna lil Santa Klaws u lill-martu fost oħrajn, kollha preparati biex f’dawn il-festi jqassmu r-rigali għat-tfal Maltin.
Tkellimna ma’ Father Christmas, li qalilna kif minn xhur qabel in-nies jibdew ifakkruh li daqt jasal iż-żmien tant favorit ma’ bosta.
U mhux l-ewwel darba li jkollu serbut ta’ karozzi warajh waqt li jkun qed iqassam ir-rigali.
“Minn tliet xhur qabel lili fejn jarawni jgħiduli wasal żmienek, lanqas temmen ir-reazzjoni tan-nies xi tkun, jiġifieri jieqfu bil-karozzi u ġieli nispiċċa carcade, inkunu żewġ karrozzi, tispiċċa tħares lura u ssib xi sitt, seba’ jew tmien karozzi, ma nafx min huma jdoqqu l-ħornijiet u tieħu pjaċir.”
Joseph Scicluna rrakkonta kif il-maġija ta’ Santa Klaws tibqa’ f’qalb dawk li meta jkunu tfal kienu jistennew bil-ħerqa lejlet il-Milied biex Father Christmas ipoġġilhom xi rigal taħt is-siġra tal-Milied.
Fost talbiet li ġieli kellu, spikkat dik meta raġel mar fuqu u talbu rigal partikolari.
“Qalli aħna ma jonqosna xejn, qalli ħaġa biss jonqosna. Qalli ġejna għandek, qalli naf li impossibbli, xtaq li jkollhom tarbija. Dak il-ħin qalbi waqfet. Jiġifieri ara kemm għadu b’saħħtu l-Father Christmas, ħafna.”
Father Christmas irrakkonta kif meta jkun qed iqassam ir-rigali bosta jżoqquh u anke jisquh, tant li jkun hemm min qed jistennih bi platt ġobon.
Iżda, Joseph qasam magħna kif il-ferħ ma jwassslux biss fi żmien il-Milied, imma anke f’Settembru, fix-xahar li tfajjel b’diżabilità jiċċelebra jum Miliedu.
L-ebda karattru ma jpoġġilu tbissima fuq fommu u ferħ daqs Father Christmas, u minkejja s-sħana u t-tidlik tar-riħ isfel, Father Christmas bil-libsa tal-bellus ħamra jmur iżur lil dan it-tfajjel.
“Ġieli morna f’Settembru f’dik is-sħana immur, u r-reazzjoni tiegħu tara d-dmugħ nieżel u jaqbeż fuqi, ir-reazzjoni lanqas temmen u ħlief babba, hi tgħidilna li jkun qed jgħid papà, ħaġa tal-iskantament kbira.”
U qabel ma tlaqna minn ma’ Santa Klaws, dan temm b’messaġġ, biex kulħadd iħalli l-ispirtu tal-Milied jgħix ġo fih, u min jiċċelebra b’xi festin, jekk ħa jixrob, ma jsuqx.
