Minn informazzjoni li għadnu f’idejh one.com.mt, l-eksdifensur ta’ Manchester United Gary Neville, li bħalissa jinsab fuq btala f’pajjiżna, ta is-somma qawwija ta’ €150,000 lil Manchester United Supportes Club (MUSC) ta’ Malta.
Id-donazzjoni mistennija tintuża biex tinxtara l-proprjetà minn fejn jopera bħalissa l-klabb fi Triq Quarries Square. Fil-Laqgħa Ġenerali Straordinarja li sejjaħ il-MUSC illejla ġie diskuss u ttieħed vot fuq ix-xiri tal-proprjetà imsemmija.
Deskritt minn Alex Ferguson bħala l-aqwa difensur lemini tal-ġenerazzjoni tiegħu fl-Ingilterra, Neville għandu għall-qalbu ħafna lil gżiritna u lill-klabb Malti. Huwa kompla jsarraf ir-rispett tiegħu lejn Malta u l-partitarji tar-Red Devils b’dan il-ġest tant umli.
Lura fl-2011, f’ikla li saret f’Malta biex ikun imfakkar it-tmiem tal-karriera tiegħu, Gary Neville wera l-interess li jikkontribwixxi l-għajnuna tiegħu lil MUSC, l-ewwel klabb tax-xorta tiegħu barra mill-Ingilterra. Huwa ma naqsax mill-wegħda tiegħu tant li f’għajnejn il-partitarji ta’ Manchester United f’Malta kompla jidher bħala eroj.
