L-Avukat tal-għaqda Repubblika u eks Deputat Nazzjonalista Jason Azzopardi qarraq dwar il-każ tas-Segretarju tal-Kabinett Ryan Spagnol.
Dan ħareġ minn fact-checker mill-gazzetta The Sunday Times of Malta hekk kif stħarreġ allegazzjonijiet minn Jason Azzopardi nnifsu dwar indħil politiku biex is-sentenza fil-konfront ta’ Ryan Spagnol ma tiġix ippubblikata f’tentattiv li dan il-każ jinħeba.
Spagnol qed jappella minn deċiżjoni marbuta ma’ offiża tat-traffiku.
Intant l-istess fact-checker sab li meta Azzopardi għamel din l-allegazzjoni serja huwa kien qed iqarraq.
Dan hekk kif il-fact-checker kiseb l-istess informazzjoni li kiseb ONE News propju jumejn ilu, jiġifieri li sentenzi bħal dawk relatati ma’ każijiet ta’ traffiku u li jinkludu inqas minn sentejn priġunerija, ma jiġux ittajpjati b’mod diġitali u mtellgħin fis-sit tal-Qorti.
Dan apparti li f’każ ta’ deċiżjoni li sentenza tal-Qorti tiġi ppubblikata onlajn, li jgħaddi perjodu ta’ ġranet qabel din tiġi ppubblikata, mhux xi ħaġa barra min-normal.
Il-fact-checker tat-Times, ikkonferma dan ma’ numru ta’ Avukati, uffiċjali tal-Qorti u anke l-Ministeru tal-Ġustizzja
Propju jumejn ilu ONE News irrapport wkoll li l-Maġistrat Jean Paul Grech, l-istess Maġistrat li ppresjeda l-kawża msemmija, iddeċieda 189 kawża b’offiżi relatati mat-traffiku minn April tal-2024.
Minn dawn 12 biss ittellgħu fis-sit tal-Qorti u dan wara talba formali li tkun saret.
L-allegazzjoni minn Jason Azzopardi ta’ ħabi ta’ din is-sentenza, ippuntat lejn l-Uffiċċju tal-Prim Ministru, bl-istess Uffiċċju mal-ewwel ċaħadha kategorikament u issa ġiet imxejna wkoll minn dan il-fact-checker.
Intant, b’rabta mal-istess każ deher fil-miftuħ il-ġlied fil-Partit Nazzjonalista u l-qasma bejn l-esponenti u d-deputati tiegħu. Dan hekk kif wara li l-Partit Nazzjonalista permezz ta’ Karol Aquilina rikeb fuq dak li qal Jason Azzopardi, Azzopardi nnifsu spiċċa jgħajjar lil Aquilina wanker u rikkieb.
