F’6 snin jonqos b’6.5% l-ammont ta’ nies li huma severament imċaħħda materjalment

F’sitt snin naqas fermi l-faqar hekk kif dawk severament mċaħħda materjalment naqsu b’sitt perċentwali u nofs.

Statistika ppubblikata mill-uffiċċju nazzjonali tal-istatistika wriet li s-sena l-oħra tlieta punt sebgħa fil-mija kienu severament imċaħħda materjalment.

Dan meta fl-elfejn u tlettax dawk severament imċaħħda materjalment kienu jgħoddu aktar minn għaxra fil-mija tal-popolazzjoni.

Dan ifisser li kien hemm tnaqqis ta’ ħamsa u għoxrin elf persuna.

L-istħarriġ li sar fuq kampjun ta’ erba’ t’elef familja wera wkoll li fl-elfejn u tlettax wkoll dawk mċaħħda materjalment kienu jgħoddu għal kważi għoxrin fil-mija u s-sena l-oħra dawn niżlu għal kważi tmienja fil-mija.

B’hekk dawk imċaħħda materjalment naqsu bi tnejn u erbgħin elf persuna.

Filwaqt li rrikonoxxa li Gvern Laburista kompla jnaqqas il-faqar permezz ta’ għadd ta’ miżuri soċjali fosthom iż-żieda fil-pensjonijiet u t-tnaqqis b’mod gradwali tal-benefiċċju tal-qgħad meta wieħed jidħol fid-dinja tax-xogħol, il-Ministru Falzon qal li l-Gvern jibqa’ impenjat biex fil-qafas tal-ġlieda kontra r-riskju ta’ faqar jew esklużjoni soċjali jniedi aktar miżuri soċjali biex tkompli titjib il-ħajja ta’ dawk l-aktar fil-bżonn fis-soċjetà Maltija.

Il-Ministru Falzon stqarr, “Huma figuri li jagħmlu kuraġġ, huma figuri wkoll illi juru li għad fadlilna x’nagħmlu u dak hemm l-impenn li bħala Gvern nibqgħu naraw u li nħarsu lejn il-faqar u nittackiljawh u ma ngħidux biss li huwa perċezzjoni kif kien jagħmel ħaddieħor.”

Fl-istħarriġ li sar, l-uffiċċju nazzjonali tal-istatistika staqsa lil dawk intervistati disa’ mistoqsijiet dwar kemm jistgħu jlaħħqu mal-ħajja.