Għada, Transport Malta ser tmexxi eżercizzju nazzjonali għal prevenzjoni tat-tniġġiż, ‘il barra mix-xtut Maltin. Ix-xenarju se jara ħafna żejt jinxtered fil-baħar wara kolliżżjoni bejn żewġ bastimenti. L-operazzjoni ta’ prevenzjoni ser tinvolvi l-Aġenzija Ewropea għas-Sigurta Marittima (EMSA), bosta entitajiet lokali u internazzjonali. L-EMSA provdiet tagħmir ġdid mill-arranġament għas-servizz t’assistenza li għandha f’Ravenna fl-Italja. L-EMSA għadha qatt m’użat dan is-set f’inċidenti fejn xtered iż-żejt. Għaldaqstant l-eżerċizzju se jipprovdi opportunitá tajba għall-operaturi biex jidraw dan it-tagħmir u jittestjaw l-użu tiegħu fil-baħar.
Bħala parti minn dan l-eżerċizzju, fis-12:50 illum, Malta talbet għall-għajnuna internazzjonali permezz tas-Sistema Komuni ta’ Informazzjoni u Komunikazzjoni f’każ t’emerġenza tal-Unjoni Ewropea (CECIS). Transport Malta għarrfet lil dawk kollha nvoluti u lil parteċipanti biex ilestu r-riżorsi tagħhom għal meta jkun hemm bżonn.
Jekk it-temp jippermetti, l-eżerċizzju fuq il-baħar ser jibda għada fit-08:00, fejn numru ta’ vaxxelli se jkunu fil-baħar biex jissimulaw it-tixrid taż-żejt. Ix-xenarju se jikkunsidra kundizzjonijiet tat-temp simulati bil-potenzjal t’eskalazzjoni. L-informazzjoni ser tasal għand il-parteċipanti hekk kif l-eżerċizzju jiżviluppa.
L-għanijiet ta’ dan l-eżerċizzju huma bosta. Dawk li jirrispondu f’każijiet simili, minn bosta entitajiet nazzjonali u minn kuntratturi privati se jkollhom l-opportunitá jipprattikaw għall-eventwalita’ li jseħħ xi tixrid taż-żejt, ser jiġu ttestjati kemm is-sistemi ta’ komunikazzjoni, it-tagħmir u ser jiġi żgurat li l-irwoli u r-responsabilitajiet ta’ dawk fil-pjan nazzjonali ta’ kontinġenza huma effettivi. Transport Malta wkoll, se tieħu l-opportunitá biex tittestja s-sistemi ta’ komunikazzjoni u t-tagħmir fiċ-Ċentru tal-Kontroll t’Emerġenza ġdid fil-Marsa. Dan minbarra li se jiġi ttestjat it-tagħmir ġdid mill-EMSA, tal-Awtoritá u tal-kuntratturi privati.
Wara analiżi tad-deċizjonijiet meħuda u l-azzjonijiet li saru, l-eżerċizzju ser jipprovdi gwida dwar kif għandhom isiru l-affarijiet u l-proċedura li għandha tapplika f’xenarji futuri. L-eżerċizzju ser jgħin ukoll biex ikun hemm għarfien fuq kemm hi effettiva l-koordinazzjoni bejn il-bosta timijiet waqt emerġenza. Transport Malta se tħejji rapport fuq l-eżerċiżżju lill-Emsa waqt it-tielet ġimgħa t’Ottubru.
Dawn t’hawn isfel se jieħdu sehem fl-eżerċizzju
• Dipartimenti u Units ta’ Transport Malta
• Il-Forzi Armati ta’ Malta – l-Iskwadra Marittima u l-Ops Room
• Id-Dipartiment għall-Protezzjoni Ċivili
• Il-Pulizija ta’ Malta
• Id-dipartiment tal-Emerġenza tal-Isptar Mater Dei
• Id-dipartiment għas-Saħħa Ambjentali
• L-Awtoritá għall-Ambjent u r-Riżorsi (ERA)
• Id-dipartiment tas-Sajd u l-Akwakultura
• L-Aġenzija Ewropea għas-Sigurta Marittima (EMSA)
• REMPEC
• Tankship Management
• Falzon Marine
• Tug Malta Ltd
• Malta Maritime Pilots
• Port Logistics Operations
• Cassar Maritime Services
• OSRA Int
• Zammit Group
• Dept of Geosciences, UoM
• L-imsieħba tal-proġett CALYPSO SOUTH
