Vulkan beda jiżbroffa fil-Lbiċ tal-Iżlanda nhar it-Tlieta b’konsegwenza li kienu evakwati turisti mil-Blue Lagoon fil-viċin u r-residenti tal-komunitajiet lokali.
Fjammi u duħħan sparaw fl-arja hekk kif infetħet qasma ħdejn il-belt ta’ Grindavík, madwar 50 kilometru fil-Lbiċ tal-kapitali, Reykjavik, b’madwar 40 dar ikunu evakwati.
Fl-2023 bosta residenti kienu ħallew il-komunità, li tinsab fil-Peniżola Reykjanes, meta l-vulkan ħa l-ħajja wara li kien ilu rieqed għal 800 sena.
Sensiela ta’ theżżiżiet żgħar bdew għall-ħabta tas-6:30am ħin lokali fl-1 ta’ April. Skont l-uffiċċju Metereoloġiku tal-Iżlanda (IMO), L-iżbroff fit-tramuntana tal-barriera protettiva qrib Grindavík beda fid-9:45am.
Is-sireni ta’ twissija bdew jindaqqu meta l-qasma laħqet il-ħitan tad-difiża tal-belt għall-ħabta tal-10am. L-IMO qal li l-qasma issa hija twila madwar 700 metru, u ma jistax jiġi eskluż li tista’ tkompli tifrex aktar fin-nofsinhar.
Il-Blue Lagoon huwa wieħed mill-akbar attrazzjonijiet turistiċi tal-Iżlanda. L-awtoritajiet evakwaw il-mistednin mill-spa ġeotermali, u rrilokawhom f’lukandi fil-qrib meta deher ċar li l-iżbroff kien imminenti.
L-effetti tal-iżbroff bħalissa huma lokalizzati u ma kkawżaw l-ebda problema għall-ajruport ta’ Keflavík fil-viċin li huwa l-ajruport internazzjonali ewlieni tal-Iżlanda.
Għalkemm sħab tal-irmied vulkaniċi preċedenti fl-Iżlanda ħarbtu l-ivvjaġġar internazzjonali bl-ajru, mhux mistenni li din id-darba jiġri hekk.
