Il-proposta tal-Oppożizzjoni dwar il-kompożizzjoni tal-membri tal-Kumitat tal-Istandards fil-Ħajja Pubblika huwa theddida għad-demokrazija u jmur kontra l-Kostituzzjoni.
Dan qaluh esperti legali li tkellmu mal-gazzetta t-Torċa, li spjegaw kif il-kumitati fi ħdan il-Parlament huma maħluqa biex jiffaċilitaw il-Parlament, u għalhekk dawn ma jistgħux ikunu komposti minn persuni mhux eletti mill-poplu fl-ogħla istituzzjoni tal-pajjiż.
L-istess sorsi spjegaw li apparti li tmur direttament kontra l-kostituzzjoni, il-proposta tal-Kap tal-Oppożizzjoni toħloq aktar problemi, speċjalment marbuta mal-prinċipju tal-privileġġ Parlamentari għal persuni li ma ġewx eletti.
Huwa għalhekk li ddeskrivew dan il-proċess bħala perikoluż u li joħloq konfużjoni hekk kif ibiddel kompletament il-funzjoni naturali tal-kumitati.
L-esperti legali li tkellmu mal-gazzetta t-Torċa nnutaw ukoll il-paradoss li toħloq il-proposta ta’ Bernard Grech, minħabba li din qed titlob lill-Parlament juri sfiduċja fih innifsu u l-Ispeaker tal-Kamra tar-Rappreżentanti, u anke jfisser li jitneħħa d-dritt tal-Parlament li jirregola l-membri tiegħu stess.
“Il-Kumitat illum hu ċar ħafna li qed jaħdem,” jgħid wieħed mis-sorsi li tkellmu mal-gazzetta, fl-isfond li anki l-Oppożizzjoni kienet ivvutat favur il-kompożizzjoni preżenti tal-Kumitat Parlamentari.
Hawn ġiet nnutata n-nuqqas ta’ garanzija fuq persuni mhux eletti mill-poplu, hekk kif xejn ma jindika li dawn ma jistgħux xorta waħda jkunu politikament motivati fid-deċiżjonijiet tagħhom.
Ġie nnutat ukoll li filwaqt li l-Membri Parlamentari jwieġbu għall-poplu, m’huwiex ċar lil min se jwieġbu persuni terzi.
Din il-proposta mill-Oppożizzjoni ġiet wara attakki kontinwi fuq l-Ispeaker tal-Kamra, Anġlu Farrugia, liema attakk tkompla anki l-Ħadd minn ħaten Beppe Fenech Adami, Kevin Cassar.
Fis-Sunday Times, Cassar li ma nġabarx meta fl-aħħar elezzjoni ġenerali ħareġ mal-Partit Nazzjonalista, kompla jattakka x-xogħol tal-Ispeaker b’attakki personali u saħansitra sejjaħlu partiġjan u bla unur.
Dan apparti li attakka wkoll lill-Prim Ministru.
